Almatyda 158 jetim bala otbasylarda tárbıelenip jatyr

ALMATY. KAZINFORM – Óńirlik kommýnıkatsııalar qyzmetinde ótken baspasóz máslıhatynda «Ulttyq bala asyrap alý agenttigi» jobasynyń jetekshisi Farıda Rahmetova kásibı qabyldaýshy otbasy ınstıtýty týraly aıtyp berdi.

Spıkerdiń sózinshe, «Ulttyq asyrap alý agenttigi – bul Qazaqstanda asyrap alý mádenıetin damytýǵa jáne kásibı qabyldaýshy otbasylardy qoldaýǵa arnalǵan joba. Onyń osy baǵytta jumys istep jatqanyna 8 jyl boldy.

– Qazir elde 20 keńes berý kabıneti jumys isteıdi, onda mamandar jetim balalardy otbasyna qabyldaǵysy keletin azamattarǵa kómek kórsetedi. Tek Almatynyń ózinde joba iske qosylǵan kezden bastap 2 285 adam mamandardan keńes alyp, al 818 azamat qabyldaýshy ata-analar mektebinde daıyndyqtan ótti,– deıdi Farıda Rahmetova.

Osy baǵdarlamanyń nátıjesinde 105 almatylyq otbasy 158 jetim balany óz qamqorlyǵyna aldy.

– Sońǵy 12 jyl ishinde ınternattyq mekemelerdegi balalar sany 10 myńnan 4 myńǵa deıin qysqardy. Alaıda sońǵy bes jylda bul kórsetkish ózgerissiz qalyp otyr. Buǵan basty sebep – jetim qalǵan balalardyń kóbiniń jasóspirimder, erekshe qajettilikteri bar balalar nemese baýyrlarynyń bolýy. Mundaı balalardy dástúrli qabyldaýshy otbasylarǵa ornalastyrý qıynyraq, – dep túsindirdi «Ana úıi» qorynyń psıholog qyzmetiniń jetekshisi Laýra Aqataeva.

Aıtýynsha,osyǵan baılanysty kásibı qabyldaýshy otbasy ınstıtýtyn engizetin zań jobasy ázirlendi. 2025 jyldyń basynda Memleket basshysy
maquldap, qujat «Neke jáne otbasy týraly» kodekske resmı túrde engizildi.

Jańa júıe aıasynda qabyldaýshy ata-analar arnaıy daıyndyqtan ótip, kásibı negizde jumys isteıtin bolady. Olarǵa memleket tarapynan qarjylyq qoldaý kórsetiledi.

– ıAǵnı, árbir ata-anaǵa 70 aı̆lyq eseptik kórsetkish (AEK) jáne balany asyraýǵa 10 AEK kóleminde aqsha tólenedi. Budan bólek, mundaı otbasylarǵa quqyqtyq, áleýmettik jáne psıhologııalyq kómek kórsetiledi. Qabyldaýshy ata-analar qatań irikteýden ótedi, olardyń motıvatsııasy men daıyndyq deńgeıin anyqtaý úshin dıagnostıkalyq suhbat júrgiziledi. Bala otbasyna qabyldanǵannan keıin turaqty túrde mamandar ony qoldap otyrady, – dep túıindedi Farıda Rahmetova.

Eske salaıyq, buǵan deıin balany qabyldaıtyn kásibı otbasylar ınstıtýty jumysyn bastaıtyny týraly jazǵanbyz.