Almatyda 13-shi Ortalyq Azııa saýda forýmy bastaldy
ALMATY. KAZINFORM — Almatyda «Saýda ıntegratsııasy: Jahandyq deńgeıge shyǵý» taqyrybynda 13-shi Ortalyq Azııa saýda forýmy óz jumysyn bastady.
Ortalyq Azııa saýda forýmy – óńirdegi yntymaqtastyqty, kásipkerlikti jáne saýda saıasatyn damytýǵa yqpal etetin iri saýda sharasy.
Azııa, Eýropa, Taıaý Shyǵys, Ulybrıtanııa, AQSh elderiniń 300-den astam bıznes basshylary men memlekettik qaıratkerleri Ortalyq Azııadaǵy saýdany ilgeriletý joldaryn úırený úshin Almatyda kezdesti.
Osy jylǵy forým jańa saýda múmkindikteri men sheteldik naryqtardy ashýǵa baǵyttalǵan, sonyń arqasynda qatysýshylar óńirlik saýdanyń keleshegin anyqtap, aýqymyn keńeıte alady. Forým sheńberinde kedendik júıeni tsıfrlandyrý, kólik jáne logıstıka, saýdany retteý (óńirlik saýda kelisimderin qosa alǵanda), dúnıejúzilik saýda uıymy men úılestirý standarttary boıynsha sessııalar kózdelgen.
«Biz on jyldan astam ýaqyt buryn saýda yntymaqtastyǵyn arttyrý turaqty, gúldengen jáne ózara baılanysty Ortalyq Azııany qura alady degen senimmen dúnıege kelgen osy forýmdy qoldaıtynymyzdy maqtan tutamyz», - dedi Vashıngton qalasynan kelgen USAID ákimshi kómekshisiniń aǵa orynbasary Zeınah Salahı forýmda sóılegen sózinde.
Ortalyq Azııa saýda mınıstrlikteri kelisim-sharttarǵa 32 mln AQSh dollarynan astam somaǵa qol qoıýǵa yqpal etti jáne qurylǵannan beri álemniń 25 elinen 10 myńnan astam memlekettik jáne bıznes kóshbasshylaryn qabyldady.
