Almatyda 114 mln teńgege jalǵan brendtik kıimderdi satqan adam sottaldy

ALMATY. KAZINFORM - Almaty qalasy Almaly aýdandyq sotynda iri mólsherde alaıaqtyq faktisi boıynsha qylmystyq is qaraldy.

Sot aqparatyna sáıkes, sottalýshy H. bir jýrnaldyń brend-dırektory qyzmetinde jumys istep júrip, jábirlenýshi K. men tanysqan. Olardyń dostyq qarym-qatynastary negizinde, Almaty men sheteldegi qoǵamdyq is-sharalarǵa birge barǵan.

H. adamdarǵa ózin sán úıler men brendtik dúkenderdiń qyzmetkeri retinde tanystyryp, olarǵa resmı dúkenderden baǵasy tómen, túpnusqadaǵy zergerlik buıymdar men brendtik taýarlardy usynǵan.

- Ol M.-ge, onyń áıeli úshin syılyq retinde brendtik sómkesin usynǵan. Er adam sottalýshyǵa 14,5 mıllıon teńge aýdarǵan. Onyń ornyna ol satyp alý chekteri men taýardyń shynaıylyǵyn rastaıtyn qujatsyz taýar alǵan. Ýaqyt óte kele, jábirlenýshi sómkeniń túpnusqa emestigin anyqtaǵan. Bul fakt taýar zertteýshisiniń ekspertızasymen rastaldy. Sottalýshy H.-nyń dál osyndaı shema boıynsha taǵy 7 alaıaqtyq epızody anyqtaldy, keltirilgen jalpy shyǵyn 114 mıllıon tenge, - dep habarlady sottan.

Sot sottalýshy H.-ny 190-baptyń 4-bóliminiń 2-tarmaǵy boıynsha kináli dep tanydy jáne oǵan 5 jyl 6 aı merzimine bas bostandyǵynan aıyrý jazasyn taǵaıyndady. Jazany taǵaıyndaý barysynda, sottalýshynyń buryn sottalmaýy jáne jeńildetetin mán-jaılar eskerildi.

Sot úkimi zańdy kúshine engen joq.

Eske salaıyq, Almatyda sheteldik týrısten 77 myń teńge talap etken taksıst jazalandy.