«Almatyda 100-den astam úı buzylýy múmkin»: Ákimdik Tilendıev kóshesin uzartýǵa qatysty túsinik berdi
ALMATY. KAZINFORM – Almatyda Rysqulov dańǵylynan qala shekarasyna deıin uzyndyǵy 10,8 shaqyrym bolatyn Tilendıev kóshesin uzartý josparda. Joba boıynsha 140-tan astam jer telimi satyp alynýy tıis, biraq naqty sany keıin belgili bolady. Bul týraly qala ákimdigi málim etti.
Buǵan deıin buqaralyq aqparat quraldarynda Almatydaǵy Ójet shaǵyn aýdanynyń turǵyndary jalpyqalalyq mańyzy bar Tilendıev kóshesiniń uzartylýyna narazylyq bildirgeni týraly aqparat paıda boldy. Baspanaly buzylady degendi estigen jurt ákimdikten jobany qaıta qaraýdy surady.
Qala ákimdigi Almatyny damytýdyń qajetti quramdas bóligi - magıstraldy joldardy uzartý ekenin atap ótti.
«Byltyr Úkimet Almaty qalasynyń 2040 jylǵa deıingi Bas josparyn bekitti. Jurtshylyqpen jáne sarapshylarmen keńinen talqylanǵan Bas josparda barlyq qajetti turǵyn úı, áleýmettik, ınjenerlik, kólik jáne basqa ınfraqurylym qarastyrylǵan. Kez kelgen qalany damytýdyń ajyramas bóligi kóshe-jol jelisin jetildirý. Máselen, Almaty jáne Almaty aglomeratsııasynyń turǵyndary úshin yńǵaıly kólik júıesin qurý úshin bas josparda kóshelerdi jeke sektor arqyly uzartýdy qosa alǵanda, keshendi sharalar kesheni kózdelgen. Mysaly, Tóle bı kóshesin uzartý úshin 270 ýchaske súriledi», - dep atap ótti ákimdikten.
Jalpyqalalyq mańyzy bar mańyzdy magıstraldy kóshelerdiń biri – Tilendıev kóshesi. Bas josparǵa jáne egjeı-tegjeıli josparlaý jobalaryna (ETJ) sáıkes bul kósheni Rysqulov dańǵylynan qala shekarasyna deıin, uzyndyǵy 10,8 km uzartý josparda.
«Uzartý jobasy 2 kezeńge bólingen. Birinshisi - Rysqulov dańǵylynan Darhan sh/a Sabataev kóshesine deıin, uzyndyǵy – 5,8 km. Joba boıynsha 149 jer ýchaskesi satyp alynady. Qazirgi ýaqytta jumys jobasy saraptamadan ótip jatyr. Ekinshisi - Sabataev kóshesinen qala shekarasyna deıin, uzyndyǵy – 4,9 km. qazirgi ýaqytta joba ázirlenýde. Satyp alynatyn jer ýchaskeleriniń sany jerge ornalastyrý jobasy ázirlengennen keıin aıqyndalatyn bolady», - dep habarlady qalalyq ákimdikten.
Ákimdikten atap ótkendeı, Tilendıev kóshesiniń trassırovkasyn ózgertý múmkin emes. Sebebi batys jaǵynda jol salýǵa bolmaıtyn úlken saı bar. Joldyń qyzyl syzyqtarynyń shyǵysqa qaraı jyljýy satyp alynatyn jer ýchaskeleriniń odan da kóp bolýyna ákeledi.
«Memleket muqtajy úshin jer ýchaskelerin satyp alý ýchaske quqyqtarynyń týyndaý negizderine qaramastan naryqtyq quny boıynsha júrgiziledi», - dep túsindirdi ákimdiktegiler.
