Almaty zoobaǵy 2028 jyly jańartylyp bitedi
ALMATY. KAZINFORM — Almaty zoobaǵyn jańartý jumystary kezeń-kezeńimen 2028 jylǵa deıin júzege asady. Bul týraly qalalyq mádenıet basqarmasy Kazinform saýalyna joldaǵan jaýapta aıtty.
Basqarma málimetinshe, aldaǵy ýaqytta zoobaq jumysyn zaman talabyna saı qaıta jandandyryp, ań-qustardy ustaý jaǵdaıyn halyqaralyq talaptarǵa sáıkes jaqsartý josparlanyp otyr.
Osy maqsatta Almaty qalasynyń aýmaǵyn damytý jospary aıasynda zoobaqty halyqaralyq standarttarǵa sáıkes zoogeografııalyq prıntsıp boıynsha qaıta jańǵyrtý kózdelgen.
— Bıyl jobalyq-smetalyq qujattamany ázirleýge konkýrs jarııalanady. Qajetti konkýrs rásimderi men saraptama qorytyndysy shyqqan soń memlekettik satyp alý týraly zańǵa sáıkes konkýrs nátıjesi kópshilikke qoljetimdi bolady. Jalpy rekonstrýktsııa jumysy kezeń-kezeńimen 2028 jylǵa deıin júzege asyrylady, — dep jazylǵan basqarma jaýabynda.
Qazaqstannyń eń kóne haıýanattar baǵynyń biri — Almaty zoobaǵy. 21 gektar jerdi alyp jatqan zoobaq 1937 jyly qurylǵan.
Zoobaqta janýarlardyń 361 túri bar. Jalpy sany — 3 838. Olardy 223 qyzmetker kútip-baǵady.
Byltyr ań-qustardy tamashalaýǵa 1 mln astam adam keldi.
Eske salaıyq, osyǵan deıin Almaty zoobaǵy Alataý qalasynyń aýmaǵyna kóshiriletini jaıly aqparat paıda bolǵan edi.
