Almaty joıqyn jer silkinisine daıyn ba - fotoreportaj
ALMATY. KAZINFORM – Almaty joǵary seısmıkalyq aımaqta ornalasqan. Jer silkiný qaýpi qashannan bar jáne tabıǵat apatynyń bul túri birneshe márte boldy da. Seısmologııa ǵylymı-zertteý ortalyǵy mamandarynyń boljaýynsha, jyl sońyna deıin 7 baldan joǵary jer silkinisi bolý yqtımaldyǵy tómen. Bul tek boljam. «Apat aıtyp kelmeıdi» demekshi, elimizdegi eń iri megapolıs joıqyn jer silkinisine qanshalyqta daıyn? Bul saýalǵa qalalyq Tótenshe jaǵdaılar departamenti jaýap berdi.
Tótenshe jaǵdaılar departamenti málim etkendeı, Almatyda kúshti jer silkinisi bolǵan jaǵdaıda sanaýly saǵatta bas saýǵalaıtyn baza qurylady.
«Tótenshe jaǵdaılar mınıstrliginiń «Alataý» ońtústik jedel bazasy qalanyń Túrksib aýdanyndaǵy Súıinbaı 248 V mekenjaıynda ornalasqan.
Lagerdi qurý ýaqyty - 12 saǵat. Materıaldyq rezerv júıesinde shatyrlar, tósekter jáne rıýkzaktar sııaqty qajetti zattar qarastyrylǵan»,- dep habarlady departamentten.
Zardap shekkenderge jyly kıimder men basqa da qajetti zattar usynylady. Ár 10 adamǵa bir medıtsınalyq jınaq beriledi, onyń ishinde alǵashqy medıtsınalyq kómek kórsetýge arnalǵan quraldar bar. Sondaı-aq lagerde shatyrlar, uıyqtaýǵa arnalǵan qaptar, úsh kúnge jetetin azyq-túlik qory bolady. Shatyrlardyń syıymdylyǵy ár qalaı 10-nan 40 adamǵa deıin. Ázirge qalashyq 50 myń adamǵa arnalǵan.
Tótenshe jaǵdaılar mınıstri Shyńǵys Árinov, Almaty mańynda osyndaı birneshe lager qurylatynyn aıtqan bolatyn. Bul bir mıllıonǵa deıin turǵyndy qaýipsizdikpen qamtamasyz etýge múmkindik beredi.
Shatyrly qalashyqqa turǵyndarǵa óz betimen barý usynylmaıdy. Adamdar ol jaqqa qala boıynsha mektepterde, ýnıversıtetterde, teatrlar men stadıondarda ornalasqan qabyldaý pýnktterinen jetkiziledi.
«Qalada baspanasyz qalǵan zardap shekken halyqty qabyldaıtyn 384 pýnkt bar. Bul pýnktterde turǵyndardy jınaý, esepke alý jáne ýaqytsha ornalastyrý jumystary júrgiziledi. Árbir zardap shegýshige jeke basyn kýálandyratyn qujattary bolmasa, onyń tegi, aty, ákesiniń aty, týǵan kúni, JSN kórsetilgen evakýatsııa týraly kýálik beriledi», - dep habarlady TJD.
Zardap shekken turǵyndar qabyldaý pýnktterinen kólikpen, onyń ishinde temirjolmen qaýipsiz aımaqtarǵa jetkiziletin bolady.
Qabyldaý pýnktteri týraly tolyq aqparat 2GIS kartasynda, Almaty TJD men ákimdiktiń resmı saıttarynda ornalastyrylǵan. Sonymen qatar depatrament QR kody bar aqparattyq taqtaıshalar ázirledi.
Kodty smartfonmen skanerlep, jaqyn mańdaǵy qabyldaý pýnktterine evakýatsııa joldaryn qaraýǵa bolady.
«Aıta keteıik, Almaty aýmaǵynda táýligine 500 adamǵa deıin qabyldaı alatyn Apattar medıtsınasy ortalyǵy men qutqarý qyzmetiniń eki kóshpeli dalalyq aýrýhanasy bar. Hırýrgııalyq kómek kórsetýge qabiletti gospıtal avtonomdy rejımde 15 kúnge deıin jumys isteı alady»,- dep habaralady vedomstvodan.
Osyǵan deıin Ulttyq seısmologııalyq baqylaýlar jáne zertteýler ǵylymı ortalyǵy dırektorynyń ǵylym jónindegi orynbasary Elızaveta Esenjigitova almatylyqtar jer silkinisine árqashan daıyn bolý kerektigin eskertken bolatyn.
Sondaı-aq «dabyl sómkesine» qandaı zattar salý kerek ekenin jazǵan edik.
Eske salaıyq, 5 qarasha kúni saǵan 10:00-de Almatyda jer silkindi.
Keıin elimizdiń bas seısmology jer silkinisine qatysty málimdeme jasady.
