Almaty josparynyń egjeı-tegjeıli jańa jobalary bekitildi
ALMATY. KAZINFORM – Almaty ákimdigi sarapshylarmen jáne qoǵam ókilderimen keńinen talqylaýdan keıin egjeı-tegjeıli josparlaý jobalaryn (ETJ) bekitti. Jańa joba qalanyń 2040 jylǵa deıingi Bas josparyna sáıkes ázirlendi.
Bas josparda megapolıstiń damýynyń monotsentrıstik modelinen polıtsentrlikke kóshý prıntsıpi jatyr. Osylaısha, 2030 jylǵa deıin qala ákimdiginiń jobalyq keńsesi aıasynda 5 polıortalyǵy qurylady – olar «Shyǵys qaqpasy», «Tarıhı ortalyq», «Soltústik», «Ońtústik-batys», «Batys» syndy arnaıy aımaqtar, qoǵamdyq jáne iskerlik belsendilik ortalyqtary.
Qalalyq josparlaý jáne ýrbanıstıka basqarmasy atap ótkendeı, jańa egjeı-tegjeıli josparlaýnyń negizgi maqsaty – ınfraqurylymnyń strategııalyq damýyn eskerip, retsiz qurylys salmaý jáne jer telimin tıimdi bólý.
Bul rette, aldyńǵy ETJ-men salystyrǵanda negizgi ózgeris qurylys salynbaǵan aýmaqtarǵa áser etti. Olardy ázirleý kezeńinde aýdan turǵyndarymen únemi kezdesýler ótkizilip, ár ýchaske boıynsha túsindirý jumystary júrgizildi.
«Jalpy, ETJ turaqty jáne fýnktsıonaldy qalalyq keńistik qurýǵa baǵyttalǵan. Ol qala qurylysyn aımaqtarǵa bólýdiń, qyzyl syzyqtardyń, halyqqa áleýmettik, mádenı jáne kommýnaldyq qyzmet kórsetý nysandaryn ornalastyrý úshin aýmaqtardy rezervteýdiń, kóshe-jol jelisin uıymdastyrýdyń, ınjenerlik kommýnıkatsııalardy júrgizýdiń, aýmaqtardy abattandyrý men kógaldandyrýdyń negizgi baǵyttaryn belgileıdi», – dedi basqarma ókilderi.
ETJ-ǵa sáıkes, «Shyǵys qaqpasy» polıortalyǵy áýejaı men Batys Eýropa-Batys Qytaı tas jolyna jaqyn ornalasqandyqtan iri kólik toraby bar logıstıkalyq hab pen kórme-oıyn-saýyq ortalyǵyna aınalady.
«Tarıhı ortalyq» qalanyń týrızm salasynda serpindi damýy úshin jańa múmkindikterge jol ashady jáne sáýlet murasyn saqtaýdyń mańyzdylyǵyn kórsetedi.
«Soltústik» polıortalyǵynyń negizgi aspektileri kósheler, skverler, shaǵyn bızneske arnalǵan birinshi qabattar, balabaqshalar, mektepter men medıtsınalyq mekemeleri bar jańa úlgidegi qurylys. Bul aımaqtan óndiris pen bazarlardy alyp tastaý usynyldy.
«Ońtústik-Batys» polıortalyǵynda iri mýltımodaldy kólik-aýystyrý toraby, LRT, BRT, metropolıten beketteri, sonymen qatar, shaǵyn ónerkásip parkteri men saýda nysandaryn salý kózdelgen.
«Batys» polıortalyǵynda Almaty-3 vokzalynyń, jelilik rekreatsııalyq saıabaqtyń jáne qajetti ınfraqurylymy bar jańa abattandyrylǵan turǵyn úıdiń qurylysy josparlanǵan.
Bul rette, kóshelerdiń birigýi men qıylysýynan barlyq aýdan bir-birinen jáne tarıhı ortalyqtan oqshaýlanbaıdy. Turǵyndar qalanyń kez kelgen jerine ońaı bara alady.
Mundaı dálizder tasymaldaý, saýda, mádenı demalys, oıyn-saýyq salasyndaǵy bıznes úshin tartymdy bolady. Ekonomıkalyq mamandanýdy eskere otyryp, saıası ortalyqtardyń qurylymyn qalyptastyrýdy 2030 jylǵa deıin aıaqtaý josparlanǵan.
ETJ-da úzdik álemdik tájirıbeler men Almatynyń geografııalyq jáne klımattyq ereksheligi eskerildi.
Ony ázirleý kezinde «Almatybasjospar» ǵylymı-zertteý ınstıtýtynyń komandasy geoaqparattyq modeldeý júıesin jáne basqa da ozyq tehnologııalardy qosqanda, qalalyq ortany keńistikti jobalaýdyń zamanaýı quraldaryn paıdalandy.
