Almaty taýlarynda joǵalǵan úsh adamnyń biriniń denesi tabyldy

ALMATY. KAZINFORM — Tótenshe jaǵdaılar mınıstrliginiń qutqarýshylary Almaty mańyndaǵy taýly aımaqta izdestirý-qutqarý jumystaryn júrgizip jatyr. 

26 jeltoqsanǵa qaraǵan túni Almaty tótenshe jaǵdaılar departamentiniń 112 pýltine áıelden habarlama túsken. Onyń aıtýynsha, baýyry eki dosymen birge 24 jeltoqsan kúni tańerteń taýǵa shyǵyp, sodan beri habarsyz ketken. Joǵalǵan azamattardyń baılanysqa shyqpaǵanyna 12 saǵattan asqan.

Habarlama túsken boıda izdestirý jumystaryna TJM kúshteri men quraldary jumyldyryldy. Olardyń qatarynda Respýblıkalyq jedel-qutqarý jasaǵy, TJM-niń apattyq medıtsına ortalyǵynyń mamandary, Qutqarý qyzmeti, polıtsııa qyzmetkerleri men eriktiler bar.

Oqıǵa ornynda jedel shtab qurylyp, TJM-niń «Qazavıaqutqarý» tikushaǵy áýege kóterildi. Áýe arqyly «Tuıyqsý» muzdyǵy, «Myńjylqy» shatqaly jáne «Lokomotıv» shyńy aýmaǵy tekserildi.

— Іzdestirý barysynda ushqyshsyz ushý apparatynyń kómegimen «Lokomotıv» shyńy mańynan bir adamnyń denesi tabyldy. Marqumnyń denesi teńiz deńgeıinen 3 700 metr bıiktikten TJM áýe tehnıkasy arqyly tómen túsirilip, polıtsııa qyzmetkerlerine tapsyryldy, — delingen habarlamada.

Atalǵan derek boıynsha sot-medıtsınalyq saraptama taǵaıyndaldy. Marqumnyń jeke basy barlyq qajetti saraptama aıaqtalǵannan keıin anyqtalady. Qaıtys bolǵan adamnyń týystaryna psıhologtar men medıtsına qyzmetkerleri tarapynan qajetti kómek kórsetilip, qalǵan eki azamatty izdeý jumystary jalǵasyp jatyr.

Al Qutqarý qyzmetiniń málimetinshe, qaıǵyly oqıǵa qar kóshkini saldarynan bolýy múmkin.

Eske salaıyq, buǵan deıin Almatyda Býtakov sarqyramasy mańynda joǵalyp ketken qyzdyń máıiti tabylǵan edi.