Almaty – Petropavl baǵytyndaǵy Talgo poıyzy kúnara qatynaıtyn boldy

ASTANA. KAZINFORM - 2025 jyldyń 15 jeltoqsanynan bastap Talgo №105/106 «Almaty – Petropavl» poıyzynyń qozǵalys kestesi jańartylady, dep habarlaıdy «Jolaýshylar tasymaly» AQ baspasóz qyzmeti.

Baspasóz qyzmetiniń habarlaýynsha, endi atalǵan baǵyt boıynsha poıyz kúnara qatynaıdy. Buǵan deıin marshrýt tórt kúnde bir ret júretin. Jıiliktiń artýy ońtústik pen soltústik óńirler arasyndaǵy kólik qoljetimdiligin kúsheıtip, qysqy maýsymda jolaýshylar úshin jol júrýdi edáýir qolaıly etedi.

Bul baǵyt boıynsha zamanaýı Talgo vagondary paıdalanylady. Olar sapardyń qaýipsizdigin jáne jol ústindegi jaılylyqty tolyq qamtamasyz etedi. Múmkindigi shekteýli jandar úshin arnaıy beıimdelgen oryndar bólingen, bılet qunyna 50%-ǵa deıin jeńildik qarastyrylǵan. Bir saparda Talgo poıyzymen 600-den astam jolaýshyny tasymaldaý múmkindigi bar.

- Bıletter bilet.railways.kz resmı saıtynda jáne barlyq temirjol vokzaldarynyń bılet kassalarynda qoljetimdi. Qosymsha aqparat alý úshin 1433 nómirine tegin qońyraý shalýǵa bolady. Poıyzdardyń naqty kelý jáne jóneltý ýaqyty týraly aqparatty  saıtyndaǵy onlaın-tablo arqyly qaraýǵa bolady, - delingen habarlamada.

Osyǵan deıin Almaty — Tashkent baǵytymen de Talgo poıyzy qatynaıtyny týraly jazdyq.