«Almaty-Óskemen» tasjolynda júk kóligi órtendi

SEMEI. KAZINFORM – «Almaty-Óskemen» tasjolynyń Abaı oblysy aýmaǵyndaǵy ýchaskesinde júk kóligi órtendi.

Oblystyq polıtsııa departamenti baspasóz qyzmetiniń málimetine súıensek, «Almaty-Óskemen» tasjolynyń 900-shaqyrymynda Shacman markaly júk kóligi órtengen.

— Aldyn ala kelip túsken derekter boıynsha órttiń shyǵýyna aýyr júk kóliginiń tehnıkalyq aqaýy sebep bolǵan. Ot dóńgelek bóliginen taraı bastaǵan. Júrgizýshi jaǵdaıdy der kezinde baıqap, kólikti toqtatyp, qaýipsiz jerge shyǵyp úlgergen. Abyroı bolǵanda zardap shekken eshkim joq, — delingen aqparatta. 

Osy rette, polıtsııa qyzmetkerleri júrgizýshilerge jolǵa shyǵar aldynda kóliktiń tehnıkalyq jaı-kúıin muqııat tekserý qajettigin eske saldy.

Eske salsaq, osyǵan deıin elordada kólik baǵanǵa soǵylyp, júrgizýshi mert bolǵany habarlanǵan.