Almaty oblysynyń turǵyndarynan 9 aıda sanepıdqyzmetke 1034 ótinish túsken

QONAEV. KAZINFORM – Almaty oblysynyń sanıtarlyq-epıdemıologııalyq qyzmetiniń 9 aıdaǵy jumys qorytyndylary týraly Bas memlekettik sanıtarııalyq dárigeri Marat Ismaılov baıandady. Onyń aıtýynsha, basty maqsat – óńir turǵyndarynyń sanıtarlyq qaýipsizdigin qamtamasyz etý. 

Jyl basynan beri aımaqta 4,5 myńnan astam juqpaly aýrý oshaqtarynda epıdemııaǵa qarsy sharalar uıymdastyrylyp, 3 myńnan astam qatynasta bolǵan adamdar tekserilip, 995 oshaq tolyq dezınfektsııalanǵan. Sonymen qatar kene entsefalıti, bezgek jáne týlıaremııa sekildi aýrýlarǵa qarsy keshendi sharalar júrgizilgen.

«738 gektar jerge kenege qarsy, 70 gektar sý aıdynyna bezgekke qarsy óńdeý jasalyp, 2 myń gektar aýmaqta týlıaremııanyń tabıǵı oshaǵynda deratızatsııalyq sharalar ótkizildi», - dedi Marat Ismaılov.

Juqpaly aýrýlardyń aldyn alý baǵytynda turaqty monıtorıngtiń arqasynda týberkýlez 72%-ǵa, sozylmaly V gepatıti 33,3%-ǵa, brýtsellez 33,9%-ǵa azaıǵan. Bul aımaqtyń epıdemıologııalyq jaǵdaıyn aıtarlyqtaı jaqsartýǵa áser etken. Degenmen bas dárigerdiń aıtýynsha, vaktsına almaǵan balalar arasynda qyzylsha, kókjótel jáne A vırýstyq gepatıti sekildi aýrýlardyń órshýi baıqalady.

«Sanıtarlyq qyzmet memlekettik baqylaý men qadaǵalaý baǵytynda da belsendi jumys istep keledi. Bıyl 1 myńnan astam memlekettik qyzmet kórsetilip, olardyń barlyǵy «E-lıtsenzııalaý» portaly arqyly avtomattandyrylǵan. Baqylaý nátıjesinde 620 tulǵaǵa 300 mıllıon teńgeden astam aıyppul salynǵan. Budan bólek, jeke jáne zańdy tulǵalardan 1 034 ótinish qaralyp, 90%-y aýa men sýdyń lastanýy, joǵary shý deńgeıi, bógde ıister jáne sanıtarlyq-qorǵaý aımaqtarynyń saqtalmaýy máselelerine qatysty bolǵan», - dedi ol.

Eske salaıyq, buǵan deıin Sanıtarlyq-epıdemıologııalyq saraptama ortalyǵynda júrgizilgen zertteýler sany eki ese artqanyn jazǵanbyz.