Almaty oblysynyń qandaı eldi mekenderine gaz tartylady

ASTANA. KAZINFORM — Bıyl Almaty oblysynyń birqatar eldi mekenine gaz tartý jumystary júrgiziledi. Bul jaıynda Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.

— Energetıka mınıstrligi tarapynan 2024 jyly Almaty oblysyn gazdandyrý úshin 9,3 mlrd teńge kóleminde qarjy qarastyryldy. Nátıjesinde 27 myń adam nemese 10 eldi meken gazǵa qosylyp, oblysty gazdandyrý deńgeıi 77 paıyzǵa jetti. 2025 jylǵa bekitilgen bıýdjette Talǵar aýdanynyń Dáýlet aýylyn gazdandyrýǵa 250 mln teńge qarastyrylǵan, — dedi Úkimet basshysy jaýabynda.

Premer-Mıınstrdiń atap ótýinshe, 2025 jyldyń bıýdjetin birinshi naqtylaý aıasynda Almaty oblysynyń ákimdigi jalpy somasy 30,2 mlrd teńge kóleminde bıýdjettik ótinim berdi. Onyń

ishinde:

— «Shelek–Kegen–Narynqol» magıstraldyq gaz qubyryn salý — 14,9 mlrd teńge;

— Eńbekshiqazaq aýdanynyń Nurly, Masaq, Dıhan, Sataı, Taldybulaq, Qarajota, Qoram, Lavar, Qaraturyq, Dostyq, Qarasaı, Qarakemer aýyldaryn, Balqash aýdanynyń Bereke aýylyn, Talǵar aýdanynyń Dáýlet aýylyn gazdandyrý, Qonaev qalasyndaǵy № 19, № 20, «Arna», «Spýtnık», «Raýan» shaǵyn aýdandarynda oramishilik gaz jelilerin salý, Talǵar aýdanyndaǵy 59,22–61,73 shaqyrym aralyǵyndaǵy «Almaty–Baıserke–Talǵar» magıstraldyq gaz qubyryn kóshirý úshin — 15,3 mlrd teńge.

— Alaıda respýblıkalyq bıýdjettiń shekteýli ekenin eskere otyryp, Almaty oblysynyń ákimdigi joǵaryda atalǵan bıýdjettik ótinimderdi bıýdjetten tys qarjylandyrý kózderin tartý arqyly júzege asyrý máselesin qarastyryp otyr, — dedi Oljas Bektenov.

Buǵan deıin Energetıka mınıstriniń buıryǵymen elimizde taýarlyq gazdyń kóterme shekti baǵasy bekitilgen edi.