Almaty oblysynyń burynǵy ákimi Ańsar Musahanov ómirden ótti

ALMATY. KAZINFORM — Memleket jáne qoǵam qaıratkeri, senattyń eks-depýtaty, Almaty oblysynyń burynǵy ákimi Ańsar Musahanov ómirden ótti.

Алматы облысының бұрынғы әкімі Аңсар Мұсаханов өмірден өтті
Фото: abai.kz

Qaraly habardy Almaty oblysynyń ákimdigi rastady.

Senator Janbolat Jórgenbaev áleýmettik jelide jazba qaldyrdy.

— Qoǵam jáne memleket qaıratker, ardaqty azamat, asyl dos Musahanov Ańsar Tursynhanulynyń dúnıeden ozýyna baılanysty qaıǵylaryńyzǵa ortaqtasyp, kóńil aıtamyn. Osyndaı aýyr kúnde qaraly kóńilderińizge jubanysh, qaıysqan qabyrǵalaryńyzǵa medet tileımin, — dep jazdy ol. 

Ańsar Musahanov 1966 jyly 31 shildede Almaty oblysynda týǵan. Almaty mal dárigerlik ınstıtýtyn, Qazaq ulttyq agrarlyq ýnıversıtetin bitirgen, mamandyǵy boıynsha — mal dárigeri, memlekettik jáne jergilikti basqarý menedjeri. Eńbek jolyn Kúrti aýdanyndaǵy «Quıǵan» keńsharynda qarapaıym jumysshy bolyp bastady.

Almaty oblysynyń memlekettik basqarý organdarynda basshy laýazymdarda qyzmet atqardy.

2003-2005 jyldary — Qazaqstan Respýblıkasy Aýyl sharýashylyǵy mınıstrligi Qarasaı aýdandyq aýmaqtyq basqarmasynyń bastyǵy boldy.

2005-2006 jyldary — Іle aýdany ákiminiń orynbasary. 2006-2009 jyldary — Jambyl jáne Qarasaı aýdandarynyń ákimi boldy.

2009-2010 jyldary — Qazaqstan Respýblıkasy Prezıdenti Ákimshiliginiń memlekettik ınspektory.

2010-2011 jyldary — Almaty oblysy ákiminiń orynbasary qyzmetin atqarǵan.

Ol Almaty oblysyn 2011-2014 jyldar aralyǵynda basqardy.

Eske sala keteıik, A. Musahanov Senat depýtattyǵyna 2014 jyly Almaty oblysynan saılanǵan bolatyn.

Сейчас читают