Almaty oblysyndaǵy aýdanda negizsiz kóterilgen sý tarıfi tómendetildi

QONAEV. KAZINFORM – Talǵar aýdanynyń prokýratýrasy turǵyndarǵa sý jetkizetin «Alatau Public Utilities» JShS belgilegen tarıfterdiń negizdiligine taldaý júrgizdi.

Almaty oblysy prokýratýrasynyń málimetinshe, buǵan deıin kásiporynnyń tarıf saıasaty áleýmettik jelilerde qyzý talqylanyp, turǵyndardyń narazylyǵyn týdyrǵan. Taldaý nátıjesinde tarıfterdiń negizsiz kóterilgeni anyqtalyp, aýdan halqy paıdalanǵan sý úshin artyq aqy tólegeni belgili boldy.

- Talǵar aýdanyndaǵy kásiporynnyń qaramaǵynda 47 uńǵyma bar, olar 150 myńnan astam turǵyndy sýmen qamtamasyz etedi. Bir tekshe metr sý úshin tarıf 132 teńge mólsherinde belgilengen. Alaıda osy 37 uńǵymanyń salyǵy tólenbegen. Sebebi olar tirkelmegen jáne jer ýchaskelerine memlekettik aktileri joq, arnaıy sý paıdalaný ruqsattary alynbaǵan. Mundaı salyqty tek arnaıy sý paıdalaný ruqsaty bar sýbektiler ǵana tóleýge tıis. Sondyqtan bul shyǵyndar tarıf quramyna zańsyz engizilgen dep tanyldy, - dep habarlady prokýratýrdan.

Prokýratýranyń qadaǵalaý aktisimen bul qarjy tarıften alynyp, sý baǵasy 132 teńgeden 129 teńge 9 tıynǵa deıin tómendetildi. Qazir kásiporyn prokýratýra aktisiniń negizinde uńǵymalardy túgendeý jáne qujattaryn rásimdeý jumystaryn júrgizip jatyr.

Eske salaıyq, buǵan deıin Almatyda sýyq sý men káriz qyzmetiniń tarıfteri tómendedi.