Almaty oblysynda jer qoınaýyn paıdalaný salasynda qandaı zań buzýshylyqtar bolǵan
QONAEV. KAZINFORM — Almaty oblysynyń prokýratýrasy tabıǵat qorǵaý zańnamasynyń saqtalýyna taldaý jasady.
Vedomstvonyń málimetinshe, oblystyń Mamandandyrylǵan tabıǵat qorǵaý prokýratýrasy kóleńkeli jer qoınaýyn paıdalanýdyń 15 faktisin anyqtaǵan. Olar boıynsha ishki ister organdarymen QK-tiń 334-babymen (jer qoınaýyn óz betinshe paıdalaný) 5 qylmystyq is tergelýde. Qorshaǵan ortaǵa 4 mlrd teńgeden astam shyǵyn keltirildi.
Prokýratýra qadaǵalaý qyzmeti barysynda paıdaly qazbalardy óndirýge lıtsenzııalardy zańsyz berýdiń 5 faktisin, kelisimsharttyq aýmaqtardan tys jerlerge shyǵýdyń 33 faktisin, sý qorǵaý beldeýleri sheginde paıdaly qazbalardy óndirý jónindegi jumystardy júrgizýdiń 23 faktisin, jer qoınaýyn paıdalaný ýchaskelerin rekýltıvatsııalaý jónindegi mindettemelerdi oryndamaýdyń 70 faktisin jáne sanıtarııalyq-qorǵaý aımaqtarynyń kelisiminsiz jáne saqtalýynsyz áreket etetin 120-ǵa jýyq jer qoınaýyn paıdalanýshyny anyqtady.
«Barlyq anyqtalǵan zań buzýshylyqtar boıynsha ýákiletti organdardyń laýazymdy adamdary tártiptik jaýapqa tartyldy, 4 mln teńgeden astam somaǵa aıyppul túrindegi ákimshilik jaýapqa 41 adam tartyldy, 7 kelisimshart buzyldy, 30-dan astam jer qoınaýyn paıdalanýshynyń qyzmeti toqtatyldy, lıtsenzııalardy qaıtaryp alý týraly 5 talap jáne josyqsyz jer qoınaýyn paıdalanýshylardy jer qoınaýyn paıdalanýdyń saldaryn joıýǵa májbúrleý týraly 20 talap engizildi (rekýltıvatsııa)», — dep habarlady Almaty oblysynyń prokýratýrasy.
Budan basqa, 24 jer qoınaýyn paıdalanýshy 3 jyldan astam ýaqyt boıy paıdaly qazbalardy óndirý úshin jer ýchaskelerin paıdalaný quqyǵyn iske asyra almaǵany anyqtaldy. Bul rette kásipkerlerde jer qoınaýyn paıdalaný quqyǵy bolǵan kezde jergilikti atqarýshy organ jer paıdalaný quqyǵyn berý jóninde sharalar qoldanbaǵan.
Osy sebepti jer qoınaýyn paıdalanýshylardyń kásipkerlik qyzmeti májbúrli túrde toqtatyldy. Bul óz kezeginde olardyń shyǵyndaryna ákeldi. Prokýratýranyń usynysy boıynsha oblys ákimdigi jer komıssııasyn qurdy, onda 13 kásipkerdi nysanaly maqsatqa sáıkestendirý jáne jer paıdalaný quqyǵyn berý týraly másele oń qaraldy.
«Buzýshylyqtardy anyqtaý jáne kóleńkeli jer qoınaýyn paıdalaný faktileriniń jolyn kesý jónindegi jumys jalǵasýda, onyń nátıjeleri boıynsha protsestiń barlyq qatysýshylarynyń is-áreketterine quqyqtyq baǵa beriletin bolady», — dep habarlady prokýratýranyń baspasóz qyzmeti.
Úılestirý keńesi otyrysynyń qorytyndysy boıynsha kelesideı sheshimder qabyldandy:
— paıdaly qazbalardyń zańsyz aınalymyna qarsy is-qımyl jónindegi vedomstvoaralyq mobıldi top qurý;
— paıdaly qazbalardy zańsyz óndirý faktileri anyqtalǵan kezde qajetti materıaldardy jınaý jáne is-qımyl tetigi boıynsha quqyq qorǵaý jáne múddeli memlekettik organdardyń qyzmetkerleri úshin algorıtm ázirleý;
— jer qoınaýyn paıdalaný salasyndaǵy ýákiletti organdardyń baqylaý fýnktsııalaryn kúsheıtý úshin zańnamalyq aktilerge ózgerister engizý qajettiligi;
— anyqtalǵan buzýshylyqtardy joıý tártibin birlesip ázirleý boıynsha memlekettik organdardyń jumys istep turǵan jer qoınaýyn paıdalanýshylarmen ózara is-qımyly;
— osy ýchaskelerde óndirýdi júrgizýge daıyn jumys istep turǵan jer qoınaýyn paıdalanýshylar arasynda konkýrstyq negizde zańsyz jer qoınaýyn paıdalaný oryndaryn bólý múmkindigin qaraý.
