Almaty oblysynda referendýmǵa daıyndyq qalaı júrip jatyr
QONAEV. KAZINFORM - Óńirlik kommýnıkatsııalar qyzmetiniń alańynda Almaty oblysynyń Aýmaqtyq saılaý komıssııasynyń tóraǵasy Meıramgúl Aıtova 2024 jyldyń 6 qazanynda ótetin referendýmǵa daıyndyq qalaı júrip jatqanyn aıtty. Bul referendýmda el turǵyndary AES qurylysyna baılanysty daýys beredi.
Meıramgúl Aıtovanyń aıtýynsha, oblys boıynsha referendým ótkizýge barlyǵy 643 saılaý ýchaskesi qurylyp, arnaıy jabyq ýchaskeler de ashylǵan. Referendýmǵa daıyndyq jumystary aıasynda oblystyń 9 aýdany men Qonaev jáne Alataý qalalarynda kóshpeli semınarlar uıymdastyryldy. Qazirdiń ózinde 1700-ge jýyq komıssııa tóraǵalary, orynbasarlary jáne hatshylary oqytylyp, sertıfıka alǵan. Oqytý jumystary áli de jalǵasyp jatyr.
Sondaı-aq ol oblystyq komıssııanyń resmı ınternet-resýrsynda «Referendým-2024» atty bólimshe qurylǵanyn aıtty. Bul bólimde únemi ınfografıka, beıne jáne aýdıomaterıaldar sııaqty medıa-kontent jarııalanyp otyrady. Oǵan qosa, saılaýshylarǵa yńǵaıly bolý úshin aımaqtyq aqparattyq tehnologııalar basqarmasymen birlesip, saılaý ýchaskeleriniń elektrondy kartasy ázirlengen. Bul karta arqyly saılaýshylar óz ýchaskesin ońaı taýyp, onyń ornalasqan jerin bir ǵana basý arqyly kartadan kóre alady.
- Barlyǵy referendýmǵa Almaty oblysynyń 994 myńnan astam turǵyny daýys bere alady. Múmkindigi shekteýli azamattardyń da qatysýyna barlyq jaǵdaı jasalǵan. Daýys berý ótetin ǵımarattardyń kireberisinde múgedekterge arnalǵan pandýstar men tutqalar ornatylǵan. Daýys berý kúni oblystyń 11 qala men aýdanynda ınvataksı qyzmeti jumys isteıdi. Sondaı-aq, sýrdotil mamandary men áleýmettik qyzmetkerlerdiń kómegin paıdalaný múmkindigi de qarastyrylǵan”, – dedi Meıramgúl Aıtova.
Daýys berý kúni oblystyń 477 ýchaskesinde onlaın-servıster arqyly saılaýshylardyń tirkeýin tekserý múmkindigi usynylady. Ýaqytsha tirkeý qajet azamattar úshin arnaıy 5 ýchaske (Qonaev qalasynda – 2, Qaskeleń, Talǵar jáne Esik qalalarynda bir-birden) bolady. Bul ýchaskelerde azamattar HQKO arqyly ýaqytsha tirkelip, óz daýysyn bere alady.
Eske salaıyq, buǵan deıin Almatyda referendýmǵa daıyndyq qalaı júrip jatqanyn jazǵan edik.
