Almaty oblysynda ózge eldiń týyn órtegen 12 adam qamaýǵa alyndy

QONAEV. KAZINFORM - Almaty oblysynda polıtsııa ózge memlekettiń týyn órtegenderge qatysty qylmystyq is qozǵady. 

Polıtsııanyń málimetinshe, 13 qarashada Uıǵyr aýdanynda turǵyndardyń ruqsatsyz jınalýynyń joly kesildi. Top músheleri shetel memleketiniń týyn jáne sol el basshylyǵynyń fotosyn órtep, zańǵa qaıshy áreketter jasaǵan.

Polıtsııanyń málimetinshe, materıaldar sotta qaralǵannan keıin 12 azamat Ákimshilik quqyq buzýshylyq týraly kodeksiniń 434-baby boıynsha 15 táýlikke deıin ákimshilik qamaýǵa alyndy. Sonymen qatar alty adamǵa 20 AEK kóleminde (78 640 teńge) aıyppul salyndy.

Osy derek boıynsha arazdyqty qozdyrý baby boıynsha qylmystyq is qozǵaldy. Qazir tergeý amaldary júrgizilip jatyr.

Polıtsııa memlekettik rámizderge qol suǵý, sondaı-aq arazdyq týdyryp, qoǵamdyq qaýipsizdikti buzýǵa baǵyttalǵan kez kelgen áreket – zańnyń óreskel buzylýy ekenin jáne mundaı faktiler zań tártibimen toqtatylatynyn qatań túrde eskertti.

Eske salaıyq, buǵan deıin «Qazaqstan Respýblıkasynyń memlekettik rámizderi týraly» Konstıtýtsııalyq zańyna jáne «Ákimshilik quqyq buzýshylyq týraly» kodeksine ózgerister men tolyqtyrýlar engiziletinin habarlaǵan edik.