Almaty oblysynda Naýryz merekesi qalaı toılanady
QONAEV. KAZINFORM — Almaty oblysynda Ulystyń uly kúni — Naýryz merekesi erekshe marafon formatynda ótedi. Onyń aıasynda 368 shara uıymdastyrylady.
Óńir ákimdiginen atap ótkendeı, mereke aıasynda teatrlandyrylǵan qoıylymdar, ulttyq oıyndar, kontsertter men erekshe mádenı performanstar uıymdastyrylady.
— Naýryz — bul tek halyqtyq mereke ǵana emes, bul — jańarý men birliktiń, urpaqtar sabaqtastyǵynyń sımvoly. Biz bul meıramdy óńir turǵyndary men qonaqtary úshin erekshe ári este qalarlyqtaı etýge bar kúshimizdi salamyz, — dedi oblys ákiminiń birinshi orynbasary Nurlan Ábdirahym.
Aıtýynsha, bıyl Naýryz merekesi on kúnge sozylatyn erekshe marafon formatynda ótedi.
Ár kúnniń ózindik taqyryby men mazmuny bar:
— 14 naýryz — Kórisý kúni (tatýlyq pen birliktiń sımvoly)
— 15 naýryz — Qaıyrymdylyq kúni
— 16 naýryz — Mádenıet pen dástúr kúni
— 17 naýryz — Otbasy jáne urpaqtar sabaqtastyǵy kúni
— 19 naýryz — Jańarý kúni
— 20 naýryz — Ulttyq sport kúni
— 21 naýryz — Birlik kúni
— 22 naýryz — Jyl basy (Naýryz merekesiniń basty kúni)
— 23 naýryz — Tazalyq kúni
Jalpy óńirde 368 merekelik is-shara josparlanǵan, olar barlyq aýdanda ótedi.
Merekeniń negizgi toılanatyn úsh basty orny anyqtaldy:
Ortalyq alań — munda 25 qazaqy kıiz úı tigilip, qonaqtar ulttyq salt-dástúrlermen tanysa alady. Kelýshilerge qazaqtyń dástúrli taǵamdary usynylyp, al basty sahnada Qazaqstan estrada juldyzdarynyń kontserti ótedi.
Qonaev kóshesi — bul alańda qolóner sheberleriniń sheberlik sabaqtary, ulttyq taǵamdar jármeńkesi men qoldanbaly óner kórmesi uıymdastyrylady.
B. Soqpaqbaev atyndaǵy qalalyq park — munda qazaqsha kúres, asyq atý, gir tasyn kóterý sııaqty ulttyq oıyndar ótedi. Sondaı-aq, qonaqtar úshin arnaıy fotozonalar, anımatorlar men balalarǵa arnalǵan oıyn-saýyq baǵdarlamasy ázirlengen.
Budan bólek, Qydyr ata beınesindegi teatrlandyrylǵan kórinis, tazartý rásimderi jáne dástúrli naýryz kóje taratylady.100 dombyrashy qazaq kúı óneriniń maıtalmany Nurǵısa Tilendıevtiń 100 jyldyǵyna arnap kúı oryndaıdy. Qazaqstandyq estrada juldyzdarynyń kontserti jáne jastarǵa arnalǵan Open Air ashyq aspan astynda merekelik shara uıymdastyrylady.
Osyǵan deıin Almatyda 20 myńǵa jýyq adam tumaý jáne JRVI juqtyrǵany belgili boldy.