Almaty oblysynda qurylysy bitpegen 5 nysan buzylady
QONAEV. KAZINFORM – Almaty oblysynda qurylysy uzaqqa sozylǵan jeti nysan bar. Bul týraly oblystyq qurylys basqarmasynyń Kazinform saýalyna joldaǵan jaýabynda aıtylǵan.
Vedomstvodan málim etkendeı, olardyń beseýi buzylady. Bul – nysandardy bastapqy maqsaty boıynsha paıdalaný múmkindiginiń bolmaýyna nemese ekonomıkalyq turǵydan tıimsizdigine baılanysty qabyldanǵan sheshim.
Sonymen qatar bir nysan boıynsha sot sheshimimen qurylys ýaqytsha toqtatylǵan, taǵy bir ǵımarattyń qurylysy jalǵasyp jatyr.
Qurylysy aıaqtalmaǵan nysandar tizimi:
– Qarasaı aýdany, Raıymbek aýyldyq okrýgine qarasty Janaturmys aýylyndaǵy kópqabatty «Eco-Rark Alatau» turǵyn úı kesheniń qurylysy jalǵasyp jatyr.
– Qarasaı aýdany, Іrgeli aýyldyq okrýgine qarasty Kemertoǵan aýylyndaǵy kópqabatty turǵyn úı qurylysyn toqtatý týraly iske qatysty apellıatsııalyq shaǵym qaralyp jatyr.
– Eńbekshiqazaq aýdany, Esik qalasy, Jeltoqsan kóshesi, 10a mekenjaıynda ornalasqan «Altyn-Bóbek» balabaqshasyna tıesili sport keshenin (basseın) – buzý týraly sheshim qabyldandy.
– Talǵar aýdany, Alataý aýyldyq okrýgi, Baıbulaq aýylynyń №474 jer teliminde qurylysy bitpegen kópqabatty turǵyn úı kesheni súriledi.
–Talǵar aýdany, Alataý aýyldyq okrýgine qarasty Baıbulaq aýylyndaǵy №592 jer telimindegi kópqabatty turǵyn úı buzylady.
– Talǵar aýdany, Gúldala aýyly Jibek joly kóshesi, 21A mekenjaıyndaǵy kommertsııalyq nysan buzylatyn boldy.
– Talǵar qalasy, Baıanaýyl kóshesi, 6 mekenjaıyndaǵy kommertsııalyq nysan súriledi.
Byltyr Almaty oblystyq qurylys basqarmasy aýqymdy tekserý júrgizip, qurylys normalary men erejelerin buzýdyń júzdegen faktisin anyqtady. Nátıjesinde 78 ákimshilik hattama toltyryldy.
Eske salaıyq, 2023 jyly oblysta 711 ákimshilik is qozǵalyp, olardyń nátıjesi boıynsha birneshe nysandy buzý týraly sheshim qabyldanǵan bolatyn.