Almaty oblysynda qoıma órtendi
QONAEV.KAZINFORM — Almaty oblysy Іle aýdany Boraldaı aýylyndaǵy ónerkásiptik aımaqta ornalasqan qoımada órt shyqty.
Almaty oblysy TJD málimetinshe, qoımada azyq-túlik ónimderi men avtokólik maılary saqtalǵan. Jalyn jalpy aýdany 600 sharshy metr aýmaqty sharpyǵan.
Órtti sóndirýge Almaty oblysy Tótenshe jaǵdaılar departamentiniń 34 qyzmetkeri jáne 13 tehnıkasy, Almaty qalasy Tótenshe jaǵdaılar departamentiniń 6 qyzmetkeri jáne 1 tehnıkasy jumyldyrylǵan.
— Órt sóndirý bólimsheleriniń jedel áreketiniń arqasynda tilsiz jaý búkil qoıma aýmaǵyna jáne janynda ornalasqan úsh qabatty ákimshilik ǵımaratqa taralýyna jol berilmedi. Órt saǵat 17:17–de oqshaýlandy. Qaza bolǵandar men zardap shekkender joq, — dep habarlady oblystyq TJD baspasóz qyzmeti.
Almaty oblysynyń qutqarýshylary ónerkásiptik nysandar men qoımalarda órt qaýipsizdigi qaǵıdalaryn saqtaý qajettigin eske salady.
Eske salaıyq, buǵan deıin Almaty qoımalarynda órt faktileri nelikten kóbeıgenin jazǵanbyz.