Almaty oblysynda qoqys polıgony órtendi

QONAEV. KAZINFORM – Almaty oblysy Uzynaǵash aýyly mańyndaǵy turmystyq qatty qaldyqtar polıgony janyp jatyr.

Almaty oblysy TJD málimetine sáıkes, 18 maýsym kúni keshki ýaqytta Jambyl aýdanyna qarasty turmystyq qatty qaldyqtar polıgonynda órt shyqqan.

— Polıgon jergilikti atqarýshy organdardyń qaramaǵynda. Nysannyń jalpy aýmaǵy — 10 gektar, qaldyqtardyń tereńdigi 3-ten 7 metrge deıin. Aldyn ala málimet boıynsha, 1 gektar aýmaqty jalyn sharpyǵan.

Órtti sóndirý jumystary sý sebý jáne qaldyqtardy qorshaý ádisteri arqyly júrgizilip jatyr, — dep habarlady oblystyq TJD.

Qazirgi ýaqytta órtti sóndirýge 25 qyzmetker men 12 tehnıka jumyldyrylǵan.

Eske salaıyq, buǵan deıin «Semeı ormany» rezervatyna órtti erte anyqtaý júıesi engiziletinin jazǵanbyz.