Almaty oblysynda egistiktiń 17 paıyzy ǵana tamshylatyp sýarylady
QONAEV. KAZINFORM — Almaty oblysynda jalpy egis alqaby — 431,2 myń gektar. Byltyr bul kórsetkish 423,9 myń gektar bolǵan edi.
Kóktemgi dala jumystary
Aldaǵy ýaqytta 224,8 myń gektarǵa ylǵal jabý, kúzdik daqyldar egiletin 26,4 myń gektar jerdi tyrmalaý, 184,9 myń gektar alqapta kóktemgi jer jyrtý jumysy júrgiziledi.
Bıyl aýyl sharýashylyǵy daqyldarynyń egis alqaby 7,3 myń gektarǵa ulǵaıyp, 431,2 myń gektarǵa jetti. Byltyrǵy kórsetkish — 423,9 myń ga.
Osy jyly 167,4 myń gektar alqapqa aýyl sharýashylyǵy daqyldaryn egý kózdelip otyr. Sonyń ishinde 167,4 myń gektarǵa — dándi daqyldar, 24,1 myń gektarǵa — maıly daqyldar, 211,8 myń gektarǵa — mal azyqtyq daqyldar, 10,3 myń gektarǵa — kartop, 17,4 myń gektarǵa — kókónis-baqsha daqyldary otyrǵyzylmaq.
— 2025 jyldyń ónimine 26,4 myń gektar alqapta kúzdik daqyldar sebildi, onyń ishinde bıdaı — 23,8 myń gektar, arpa — 1,5 myń gektar, 1,1 myń gektarǵa basqa daqyldar. Sondaı-aq 81,8 myń gektarǵa súdiger jyrtyldy, — dep habarlady Almaty oblysy aýyl sharýashylyǵy basqarmasynan.
Tyńaıtqysh
2024-2028 jyldarǵa arnalǵan jol kartasyna sáıkes, osy jylǵa qajetti tyńaıtqysh kólemi 60,8 myń tonna. Bıyl 105,6 myń tonna qajettilik kezinde oblysta 60,8 myń tonnaǵa jýyq mıneraldy tyńaıtqysh engizý josparlanǵan.
— Ónim kólemin ulǵaıtý úshin 1 mlrd teńge somasyna sýbsıdııa kózdelgen, bul shamamen 15 myń tonna mıneraldy tyńaıtqysh satyp alýǵa múmkindik beredi — bul ótken jylmen salystyrǵanda 1 myń tonnaǵa artyq. Mıneraldy tyńaıtqyshtyń qunyn sýbsıdııalaý boıynsha memlekettik qoldaý kórsetiledi, — dep atap ótti vedomstvodan.
Dızel
Aýyl sharýashylyǵy taýaryn óndirýshilerden 2025 jylǵy kóktemgi dala jumysyna dızel otynyna ótinim 1-31 jeltoqsan aralyǵynda gosagro elektrondy portaly arqyly qabyldandy.
Kóktemgi dala jumystaryna jalpy kólemi 6521 tonna dızel otynyna 485 aýyl sharýashylyǵy taýar óndirýshisiniń ótinimi maquldandy.
— 2025 jyly kóktemgi egis jáne egin jınaý jumystaryna arnalǵan dızel otyny shyǵysynyń bazalyq normatıvteri ózgerdi. Bul ózgerister óńirlerdiń topyraq-klımattyq jaǵdaılaryn eskere otyryp, agrarlyq beıindegi ǵylymı uıymdardyń usynystary negizinde aıqyndaldy, — dep túsindirdi basqarma ókilderi.
Aýyl sharýashylyǵy tehnıkasynyń parkin jańartý
2024 jyldyń qorytyndysy boıynsha jalpy quny 5,9 mlrd teńgege 473 aýyl sharýashylyǵy tehnıkasy satyp alyndy. Belgilengen josparǵa sáıkes bıyl 665 jańa tehnıka satyp alý josparda.
Kóktemgi dala jumystaryna «Agrarlyq nesıe korporatsııasy» arqyly «Keńdala» baǵdarlamasymen bıyl 7,4 mlrd teńge nesıe bólindi, búgingi kúnge 2,5 mlrd teńgege 40 ótinim tústi.
Sý únemdeý tehnologııasy
— 2024 jyly Almaty oblysy boıynsha sý únemdeý tehnologııasyn paıdalanatyn alań 43,6 myń gektar boldy. Onyń ishinde jańbyrlatyp sýarý — 24,7 myń gektar, tamshylatyp sýarý — 18,9 myń gektar. Sýarmaly egistikti qamtý úlesi — 17,7 paıyz. Sý únemdeý tehnologııasy maıly daqyl, kókónis-baqsha daqyldary, kópjyldyq shóp sııaqty daqyldardy ósirýge qoldanylady. Búgingi tańda oblys boıynsha sý únemdeý tehnologııasyn 161 aýyl sharýashylyǵy taýar óndirýshisi qoldanyp otyr. Osy jyly bul kólemdi sýbsıdııalaý, nesıe berý arqyly 93,6 myń gektarǵa deıin ulǵaıtý josparda, — dep habarlady basqarmadan.
Eske salaıyq, Qazaqstanda 2025 jylǵy kóktemgi egis jumystaryn qarjylandyrý byltyr qarasha aıynda bastalǵan bolatyn.