Almaty oblysynda Dostyq úıin salý kerek

ASTANA. KAZINFORM – Almaty oblysynda Dostyq úıin salý kerek. Bul týraly Qazaqstan halqy Assambleıasynyń XXHІV sessııasynda Memleket basshysy Qasym-Jomart Toqaev aıtty.

- Assambleıa aımaqtardaǵy jumysty jandandyrýy kerek. Byltyr elimizdiń rýhanı jáne tarıhı-mádenı ordasy – Túrkistanda jańa Dostyq úıi ashyldy. Endi osyndaı Dostyq úıin halyq tyǵyz qonystanǵan Almaty oblysynda salý qajet. Bul ǵımarat aımaqtyń qoǵamdyq ómiri úshin óte mańyzdy ortalyq bolmaq. Túrli etnos ókilderi turatyn Qordaı, Uıǵyr, Saıram, Panfılov jáne basqa da aýdandarda Assambleıa ashý kerek. Sonymen qatar Dostyq úıleri taǵy birneshe qala men aýdan ortalyǵynda ashylady dep josparlanyp otyr. Men bul bastamany qoldaımyn, - dedi Qasym-Jomart Toqaev. 

Memleket basshysy qoǵamdyq kelisim ınfraqurylymyn birtindep keńeıte berý kerektigin basa aıtty. 

- Barlyq aımaqtaǵy Dostyq úılerin óz azamattarymyz da, qajet bolyp jatsa, sheteldik qonaqtar da baratyn týrıstik baǵyttar kartasyna engizgen jón. Quzyrly organ basshylary men ákimder Assambleıanyń etnomedıatsııa salasyndaǵy jumysyna jan-jaqty qoldaý kórsetýge tıis. «Eldesý jáne tatýlasý» jobasynyń aýqymyn keńeıtip, ony aldaǵy eki jylda búkil elge taratý qajet. Úkimet pen ákimder Assambleıanyń basqa da jobalaryn qoǵamdyq-saıası jumys josparlaryna qosyp, naqty sharalar qabyldaýy kerek, - dedi Prezıdent. 

Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.