Almaty oblysynda bıyl qansha jańa mektep ashylady

QONAEV. KAZINFORM – Ótken oqý jylynda Almaty oblysynda 437 jalpy bilim beretin memlekettik mektep jáne 47 jekemenshik mektep jumys istedi.

Kazinform saýalyna jaýap bergen Almaty oblysy bilim basqarmasynyń basshysy Saltanat Bespaevanyń aıtýynsha, jańa oqý jylynda oblys boıynsha 11 jańa nysandy paıdalanýǵa berý josparlanyp otyr. Atap aıtqanda:

– Eńbekshiqazaq aýdany: Qarajota aýylynda 300 orynǵa, Almaly aýylynda 600 orynǵa, Sataı aýylynda 900 orynǵa, Aşysaı aýylynda 600 orynǵa;

– Talǵar aýdany: Jalǵamys, Tóńkeris aýyldarynda 600 orynǵa, Qyzyl tý aýylynda 900 orynǵa, Tuzdybastaý aýylynda 1500 orynǵa;

– Іle aýdany: Qoıanqus aýylynda 900 orynǵa;

– Jambyl aýdany: Sarybaı bı aýylynda 600 orynǵa arnalǵan bilim ordasy paıdalanýǵa berilmek.

Sondaı-aq Saltanat Bespaeva 2025-2026 oqý jylynda 1 synypqa 35500 oqýshy qabyldaý josparlanǵanyn atap ótti. Qazirgi tańda 25 807 oqýshyny 1 synypqa qabyldaý týraly ótinish tirkelgen. Onyń ishinde qazaq synybyna – 19 533, orys synybyna - 5577, uıǵyr synybyna – 697 oqýshy.

– 1 synypqa qabyldaý jumystary tamyz aıynyń sońyna deıin jalǵasatyn bolady, - dedi basqarma basshysy.

Eske salaıyq, Almaty qalasynda 7 jańa mekteptiń qurylysy aıaqtaldy, taǵy 4 mektep tamyz aıynyń sońyna deıin paıdalanýǵa berilmek. Al 1 qyrkúıekte 26 myńnan astam 1-synyp oqýshysy mektep tabaldyryǵyn attaıdy dep josparlanǵan. Búgingi kúni 18 myńnan astam bala qabyldanǵan.