Almaty oblysynda bıyl 8 esirtki zerthanasy joıyldy
QONAEV. KAZINFORM – Jyl basynan berń Almaty oblysynda bir tonnadan astam esirtki tárkilengen.
Almaty oblysy polıtsııa departamenti bastyǵynyń birinshi orynbasary Baǵdat Áshimovtyń aıtýynsha, tártip saqshylary bıyl 8 esirtki zerthanasyn joıdy. Olardyń ekeýi sıntetıkalyq esirtki óndirýge mamandanǵan bolsa, qalǵandary quramynda esirtkisi bar ósimdikterdi zańsyz ósirýmen aınalysqan.
– Jyl basynan beri 111 esirtkige qatysty quqyqbuzýshylyq anyqtaldy. Onyń 66-sy – qylmystyq is. Olardyń qatarynda asa iri kólemde esirtki saqtaý, satý, daıyndaý jáne esirtki jarnamasy bar. Zańsyz aınalymnan bir tonnadan astam esirtki tárkilendi. Atap aıtqanda, 164 keli sıntetıkalyq esirtki, 21 keli marıhýana, 9 keli gashısh, 242 gramm geroın jáne 900 keli jabaıy qarasora, - dedi Baǵdat Áshimov.
1 maýsymnan bastap oblys aýmaǵynda aýqymdy «Qarasora-2025» jedel-aldyn alý is-sharasy bastalǵan. Іs-sharanyń maqsaty – zańsyz egistikterdi anyqtap, jabaıy qarasorany joıý, tranzıttik arnalardy kesý jáne uıymdasqan qylmystyq toptardy áshkereleý.
– Operatsııa bastalǵaly 12 qylmystyq quqyqbuzýshylyq tirkeldi. Olardyń ishinde – esirtkini satý, asa iri kólemde saqtaý jáne zańsyz ósirý faktileri bar. Mysaly, Іle aýdanynda satý faktisi, al Talǵar aýdanynda esirtkini saqtaý boıynsha toǵyz derek tirkeldi, onyń ekeýi – asa iri kólemde, - dedi Baǵdat Áshimov.
Odan bólek baqylaýdy kúsheıtý maqsatynda Almaty–Bishkek jáne Almaty–Óskemen tas joldarynda túngi jyljymaly eki birdeı blokbeket qoıylǵan.
Eske salaıyq, buǵan deıin Almaty oblysynda jasyryn esirtki zerthanasy tabylǵanyn jazǵanbyz.