Almaty oblysynda bıyl 47 saıajaı eldi mekenderdiń quramyna enedi

QONAEV. KAZINFORM — Almaty oblysynda barlyǵy 677 saıajaı qaýymdastyǵy bar. 

Oblys ákimdiginiń málimetinshe, saıajaı alqaptarynyń eń kóbi Qarasaı aýdanynda — 203. Sondaı-aq Іle aýdanynda — 118, Talǵar aýdanynda — 151, Eńbekshiqazaq aýdanynda — 135, Jambyl aýdanynda — 21 jáne Qonaev qalasynda — 9 jáne Alataý qalasynda — 40 saıajaı bar.

2025 jyly tórt eldi mekenniń quramyna 23 baý-baqsha qaýymdastyǵyn engizý úshin qujattamany daıyndaý aıaqtalǵan. Qazirgi ýaqytta shekaralardy ózgertý jumysy júrgizilip jatyr. Osydan keıin saıajaı turǵyndary resmı túrde aýyl turǵyny mártebesine ıe bolady.

Onyń ishinde Qarasaı aýdanynda Kólaşy aýylyna «Aımóldir» baý-baqsha qaýymdastyǵyn jáne ataýy joq taǵy bir alqapty qosý josparlanǵan. Turar aýylyna bir saıajaı alqaby, al Bekbolat aýylyna «Saıan» baý-baqsha qaýymdastyǵy engiziledi. Eńbekshiqazaq aýdanynda Azat aýylynyń quramyna «Entýzıast», «Almagúl 2», «Arman 2», «Zvezdochka», «Vıktorııa», «Dostyq» jáne basqa da birqatar baý-baqsha seriktestikteri qosylady.

Bıyl taǵy úsh eldi meken boıynsha qujattar ázirlenip, olardyń quramyna 47 saıajaı seriktestigin engizý josparlanyp otyr. Atap aıtqanda, Eńbekshiqazaq aýdanynda Bólek aýylyna «Kırovets-37», «Drýjba», «Taýgúl», «Jetisý», «Esik», «Romashka» jáne basqa da ondaǵan alqapty qosý kózdelgen.

Qarasaı aýdanynda Ulan jáne Kemertoǵan aýyldary quramyna «Kashtan», «Jaıyq», «Shyǵys Agro», «Nur Plaza», «Navat» jáne «Alash Orda» alqaptary engiziledi.

— Jerdiń nysanaly maqsatyn ózgertý máselesi saıajaı turǵyndary úshin ózekti bolyp qala beredi. Bul múmkindik eldi mekenderdiń bas jospary men qala qurylysy qujattamasyna sáıkestigine baılanysty qarastyrylady. Nysanaly maqsatty ózgertý tek bas jospar men egjeı-tegjeıli josparlaý jobalaryna sáıkes kelgen jaǵdaıda ǵana ruqsat etiledi, — dep túsindirdi ákimdikten.

Eske salaıyq, byltyr Qonaevtaǵy birqatar saıajaıǵa shaǵyn aýdan statýsy berildi.