Almaty oblysynda 130 demalys orny baqylaýǵa alyndy
QONAEV. KAZINFORM – Almaty oblysynda jazǵy shomylý maýsymynyń bastalýyna baılanysty sý aıdyndarynyń qaýipsizdigi men jaǵajaılardyń sanıtarııalyq jaǵdaıy erekshe baqylaýǵa alyndy.
Almaty oblysy Sanıtarııalyq-epıdemıologııalyq baqylaý departamentiniń basshysy Marat Ismaılovtyń aıtýynsha, sý obektileriniń sanıtarııalyq jaǵdaıy halyq densaýlyǵy úshin asa mańyzdy másele. Sebebi Dúnıejúzilik densaýlyq saqtaý uıymynyń derekterine sáıkes, álemdegi aýrýlardyń 80%-y sapasyz sýmen baılanysty.
- Almaty oblysynda 130 demalys orny baqylaýǵa alynǵan. Onyń 90-y Qonaev qalasynda, Eńbekshiqazaq, Balqash jáne Іle aýdandarynda ornalasqan. Sonymen qatar 33 qala syrtyndaǵy oqýshylar lageri de sanıtarııalyq tekserýden ótip jatyr. Departament jyl saıyn maýsym bastalar aldynda sý men jaǵajaı qumyn zerthanalyq tekserýden ótkizedi. Bıylǵy maýsymǵa daıyndyq aıasynda 147 sý 51 topyraq synamasy alynǵan, - dedi ol.
Marat Ismaılov shomylýǵa arnalǵan sý aıdyndaryn paıdalanatyn kásipkerler QR Densaýlyq saqtaý mınıstrliginiń sanıtarııalyq erejelerine sáıkes sanıtarlyq-epıdemıologııalyq qorytyndy alýǵa mindetti ekenin atap ótti. Onyń aıtýynsha, jaǵajaı aýmaǵynda kóleńke túsiretin shatyrlar, shezlongtar, kabınalar, tazalyqqa arnalǵan quraldar ornatylyp, kún saıyn dezınfektsııa men tazalaý jumystary júrgizilýi tıis.
- Jaǵajaıdy tańdaý kezinde birneshe qarapaıym erejeni saqtaý qajet. Atap aıtqanda, demalys orny las aǵyndy sýlardan, mal jaıylymynan jáne óndiris oryndarynan keminde 500 metr qashyqtyqta ornalasýy tıis. Balalardyń shomylýyna tek aýa temperatýrasy +23°C jáne sý temperatýrasy +20°C bolǵanda ǵana ruqsat beriledi, - dedi maman.
Eske salaıyq, buǵan deıin Qonaevtaǵy demalys aımaǵynda tok soqqan 11 jasar bala qaıtys bolǵanyn jazǵanbyz. Bul derek boıynsha Qonaev qalasynyń polıtsııa basqarmasy Qazaqstan Respýblıkasy Qylmystyq kodeksiniń 306-babynyń 3-bóligi boıynsha qylmystyq is qozǵady.
Qonaev qalasy ákiminiń orynbasary Jansultan Ońalbaevtyń Kazinform agenttigine bergen jaýabynda barlyq jaǵalaý aımaǵynda, sonyń ishinde jeke menshiktegi aýmaqtarda ınjenerlik ınfraqurylymnyń, onyń ishinde elektr jelileriniń tehnıkalyq jaı-kúıin jospardan tys keshendi tekseriletinin aıtty.