Almaty oblysynda 100 keli esirtki tárkilendi

QONAEV. KAZINFORM - Almaty oblysynyń esirtki qylmysyna qarsy is-qımyl qyzmetkerleri Bas prokýratýranyń birinshi qyzmetimen birlesip, ónerkásiptik aýqymdaǵy esirtki zerthanasyn anyqtady.

Esirtki óndirisi Talǵarda ornalasqan fermalardyń birinde uıymdastyrylǵan. Tintý kezinde 8 tonnadan astam prekýrsor men 100 keli daıyn ónim, mefedron tárkilendi.

- Jalpy somasy 3 mlrd teńge bolatyn sıntetıkanyń eki júz myńnan astam bir rettik dozasy zańsyz aınalymǵa jiberilmedi. Esirtki quraldaryn daıyndaǵany úshin ómir boıyna bas bostandyǵynan aıyrýǵa deıin jaza baryn eskertemiz, - dep habarlady oblystyq polıtsııadan.

Eske salaıyq, polıtsııa tórt aıda 20 uıymdasqan qylmystyq toptyń jolyn kesip, 3,5 tonna esirtki tárkilegenin jazǵanbyz.