Almaty oblysynda 10 jasar bala ıtterge talandy

QONAEV. KAZINFORM – Almaty oblysy Qarasaı aýdanynda birneshe ıt balaǵa shabýyl jasaǵan.

Jelidegi málimetke sáıkes, fýtbol alańynda oınap júrgen balaǵa jeke aýmaqtan shyǵyp ketken úsh ıt shabýyl jasaǵan. Balany jaqyn mańdaǵy adamdar qutqaryp qalǵan.

Almaty oblysy densaýlyq saqtaý basqarmasynyń málimetinshe, 30 maýsym kúni saǵat 17:02-de Qarasaı aýdandyq aýrýhanasynyń qabyldaý bólmesine 2014 jyly týǵan bala túsken. Ol birden reanımatsııaǵa jatqyzylyp, birneshe saǵattan keıin travmatologııa bólimshesine aýystyrylǵan.

- Alǵan jaraqatyna baılanysty tańerteń balanyń jalpy jaǵdaıy ortasha aýyrlyqta dep baǵalandy. Emdeý hattamaǵa sáıkes alynady, - dep habarlady basqarmadan.

Al oblystyq polıtsııa departamenti kámeletke tolmaǵan balanyń densaýlyǵyna abaısyzda aýyr zııan keltirý faktisi boıynsha polıtsııa qylmystyq is tirkep, sotqa deıingi tergeý amaldaryn júrgizip jatqanyn habarlady.

- Qazirgi tańda oqıǵanyń kýágerlerinen jaýap alynyp, barlyq mán-jaıyn jan-jaqty, tolyq jáne obektıvti anyqtaýǵa baǵyttalǵan birqatar tergeý áreketteri júrgizilip jatyr. Tıisti saraptamalar taǵaıyndaldy, onyń qorytyndysy boıynsha sońǵy protsessýaldyq sheshim qabyldanady, - dep habarlady polıtsııadan.

Eske salaıyq, bıyl Almatyda qańǵybas janýarlardy aýlaýǵa 580 mln teńge bólindi.