Almaty oblysynan Qytaıǵa et ónimderiniń eksporty bastaldy
QONAEV. KAZINFORM - Jıyrma jyldan keıin Qytaı Qazaqstannan et ımporttaýǵa salǵan tyıymyn alyp tastady. Qus ónimderine bul tyıym 2005 jyly engizildi, al aýsylǵa shekteýler 2022 jyly belgilendi.
2023 jyldyń qarashasynda eki eldiń ókilderi arasynda kelissózder ótip, nátıjesinde saýda kedergilerin joıý týraly kelisimge qol jetkizildi.
Almaty oblysynyń kásipkeri, «Meat Processing and Service» JShS bas dırektory Abdrasılov Baqytjan shekteýler joıylǵannan keıin et ónimderiniń birinshi partııasyn, Qytaı Halyq Respýblıkasynyń veterınarlyq-sanıtarlyq talaptaryna saı keletin 20 tonna sıyr etin sátti eksporttady.
Bul kásiporyn 2009 jyldan beri jumys isteıdi jáne «Qazaqstan et odaǵy» respýblıkalyq qaýymdastyǵynyń múshesi. Ol iri jáne usaq maldyń etin óńdeýge jáne konservileýge, sondaı-aq maldy bordaqylaýǵa jáne soıýǵa mamandanǵan. Kásiporynnyń mal basy 1,2 myńnan asady, al bordaqylaý bazasy bir mezette 3 myń basqa deıin maldy qabyldaı alady. Kásiporynnyń óndiristik qýaty 10 saǵatta 200 basqa deıin iri qara maldy jáne 1000 basqa deıin usaq maldy óńdeýge múmkindik beredi. Sonymen qatar, Iran, Saýdııa, Katar, BAÁ, Oman jáne Bahreın elderimen kóterme et saýdasy jolǵa qoıylǵan.
Oblys ákiminiń orynbasary Almas Batanov pen aýyl sharýashylyǵy basqarmasynyń basshysy Qýandyq Chýnkýnov kásiporyndy aralap, onyń eksporttyq áleýetin joǵary baǵalap, bul qadamnyń óńirdiń agroónerkásip keshenin damytý jáne Qazaqstannyń álemdik naryqtaǵy ornyn nyǵaıtýdaǵy mańyzdylyǵyn atap ótti.
«Bul jetistik – sapaly et ónimderimen el ekonomıkasyna súbeli úles qosyp kele jatqan Almaty oblysy sharýalarynyń eńbeginiń jemisi. Biz agroónerkásiptik keshenniń odan ári damýyna jáne Qazaqstannyń halyqaralyq ustanymynyń nyǵaıýyna septigin tıgizetin, aımaqtyń eksporttyq múmkindikteri odan ári arta túsetinine senimdimiz», – dedi oblys ákiminiń orynbasary Almas Batanov.
Et ónimderiniń birinshi partııasyn Qytaıǵa eksporttaý – Almaty oblysynyń agroónerkásip kesheni úshin eleýli jetistik. Bul qadam qazaqstandyq ónimniń joǵary sapasyn rastap qana qoımaı, aýyl sharýashylyǵyndaǵy halyqaralyq yntymaqtastyqty damytýdyń jańa perspektıvalaryn ashady. Biz óńir kásipkerleriniń tabystaryn maqtan tutamyz jáne elimizdiń ekonomıkasyn nyǵaıta túsetin eksporttyq múmkindikterdiń odan ári ósetinine senimdimiz.
