Almaty oblysy ákimdigi 19 mln teńgege komıks túsirmek

QONAEV. KAZINFORM — Almaty oblystyq din isteri basqarmasy ekstremızmge qarsy kúres pen dástúrli qundylyqtardy dáripteý úshin arnaıy komıkster túsirmek. Bul aqparat memlekettik satyp alý portalynda jarııalandy. 

Joba quny — 19 701 000 teńge. Tapsyrys berýshi — Almaty oblystyq din isteri basqarmasy.

Tehnıkalyq sıpattamaǵa sáıkes, maqsat — oqyrmandardy qazaq tarıhyndaǵy tanymal tulǵalarmen tanystyrý. Olardyń qatarynda — batyrlar, zııaly qaýym ókilderi jáne basqa da qaıratkerler bar.

Joba aıasynda qazaq jáne orys tilderinde kem degende 10 anımatsııalyq komıks ázirlenip, jaryqqa shyǵady. Olardyń árqaısysy keminde 15 betten turýy kerek. Baspa nusqada da, elektrondy formatta da qoljetimdi bolýy shart.

Sondaı-aq, ár komıkstiń dızaıny, formaty men mazmuny tapsyrys berýshiniń kelisimimen bekitiledi. Keminde 1000 dana basylyp shyǵýy tıis. Al ár jeke komıkstiń taralymy 100 danadan az bolmaıdy.

Komıksterdiń stsenarıi tek dástúrli qundylyqtardy ǵana emes, dinı ekstremızm men terrorızmge qarsy kúres taqyryptaryn da qamtýy tıis.

Budan bólek, oqyrmanǵa patrıottyq sezim, týǵan elge degen mahabbat, qazaq folklory men tarıhı oqıǵalarǵa qyzyǵýshylyq darytý kózdelip otyr.

Stsenarıı maquldanǵannan keıin, qazaq jáne orys tilderinde 10 vıdeokomıks daıyndalady.

Jobanyń aıaqtalý merzimi — 15 jeltoqsan 2025 jyl

Eske salaıyq, byltyr elde terrorızmdi nasıhattaý jáne ekstremıstik uıymdarǵa qatysý sııaqty 85 qylmysty anyqtaldy.