Almatyda 17-18 mamyr kúnderi «Mýzeı túni» ótedi
ALMATY. KAZINFORM – Almatyda halyqaralyq mýzeı kúni qarsańynda «Mýzeı túni» aktsııasy ótedi.
1978 jyldan bastan 18 mamyr kúni búkil álem mýzeı qyzmetkerleriniń kásibı merekesin atap ótedi. «Mýzeı túni» aktsııasy alǵash ret 1997 jyly Berlınde uıymdastyrylǵan, 2005 jyldan beri Qazaqstanda da ótip keledi.
Bıyl merekelik baǵdarlama 16 mamyr kúni Almaty mýzeıinde Vengrııanyń Bas konsýldyǵymen birlesip qolǵa alǵan «Mato halyq óneri – vengr mádenıetiniń murasy» atty halyqaralyq kórmeniń ashylý saltanatymen bastalady. Bul kórme Qazaqstanda alǵash ret ótkeli otyr.
Odan keıin Qazaqstan Ortalyq memlekettik mýzeıinde 17 mamyr kúni mádenı mereke — «Mýzeı túni – 2025» aktsııasy ótedi. Mýzeı qabyrǵasynda 18:00-den 23:00-ge deıin mazmundy baǵdarlama kórermender nazaryna usynylady.
– Іs-shara barysynda Shoqan Ýálıhanovtyń 190 jyldyǵyna, Nurǵısa Tilendıevtiń 100 jyldyǵyna, sondaı-aq mýzykatanýshylar Ahmet Jubanov pen Ǵazıza Jubanovanyń murasyna arnalǵan kórmeler men tanymdyq dúnıeler ótedi. Odan bólek Mánshúk Mámetova men Boran Nysanbaevtyń memorıaldyq mýzeıleri qatysatyn «Mýzeı sherýi» uıymdastyrylady, – deıdi QR Ortalyq memlekettik mýzeıi dırektorynyń mindetin atqarýshy Serjan Barahanuly.
Merekelik baǵdarlama aıasynda mýzeıdiń ǵylymı kitaphanasynda «Bilim júıesin damytý», «Otbasy hrestomatııasy» atty kitap jármeńkesi, sondaı-aq «Ónerdiń qudiretti kúshi» atty qolóner sheberleriniń kórme-jármeńkesi uıymdastyrylady.
– Halyqaralyq mýzeı kúni aıasynda Iran Islam Respýblıkasynyń Almatydaǵy Mádenı ókildigi «Irannyń dástúrli mádenıeti men óneri» atty kórme ótkizedi. Qonaqtar parsy kallıgrafııasymen tanysyp, Isfahannan arnaıy kelgen sheberler — Nafısa Orýdjı, Márııam Jafarı jáne Hosseın Hýshbatenmen tikeleı tildese alady, – dep tolyqtyrdy Serjan Barahanuly.
Sonymen qatar kelýshilerge restavratsııa boıynsha sheberlik saǵattarǵa qatysý, ǵylymı ınteraktıvterge aralasý, mýzeı kvestteri men tanymdyq oıyndarǵa qatysý múmkindigi de usynylady.
Al 18 mamyrda Ábilhan Qasteev atyndaǵy QR Memlekettik óner mýzeıinde dástúrli «Mýzeı túni - 2025» mádenı-bilim berý aktsııasy saǵat 14:00-den 00:00-ge deıin ótedi. Keshtiń taqyryby — «Ózgermeli álemdegi dástúr men zamanaýılyq».
Baǵdarlama eki bólimnen turady. Balalarǵa arnalǵan «Mýzeı kúni» - bul ýaqyt aralyǵynda kishkentaı qonaqtar men otbasylar úshin sheberlik saǵattary, «Art- sheberhanamen» kvest-oıyndar uıymdastyrylady. Ekinshi, «Mýzeı túni» baǵdarlamasy - kelýshiler nazaryn teatrlandyrylǵan mýzykalyq jáne bı kórinisteri, performanstar, avtorlyq ekskýrsııalar, lektsııalar men erekshe tosynsyılar kútedi.
Saǵat 17:00-den bastap mýzeı qabyrǵasynda qazaq jáne orys tilderinde ekskýrsııa júrgiziledi. 19:00-00:00 aralyǵynda klassıkalyq mýzyka, horeografııa, sahnalyq kórsetilim kiretin kontserttik baǵdarlama bastalady.
Sondaı-aq 18 mamyr kúni saǵat 10:00-den bastap túnge deıin Almaty qalasynyń mýzeıler birlestigine kiretin 7 mýzeı almatylyqtardy tegin qabyldaıdy:
- Almaty mýzeıi;
- Yqylas atyndaǵy Halyq aspaptary mýzeıi;
- D.A. Qonaev mýzeıi;
- S. Muqanovtyń mýzeı-úıi;
- Ǵ. Músirepovtyń múzeı-úıi;
- Ahmet Baıtursynulynyń mýzeı-úıi;
- Mýltımedııalyq dástúrli mýzyka ortalyǵy.
Eske salaıyq, byltyr Almatyda «Mýzeı túni» qalaı ótkenin jazǵanbyz.