Barlyq óńirler Bilim kúnin 1 qyrkúıekte atap ótedi

ASTANA. KAZINFORM – Bilim kúnine arnalǵan saltanatty is-shara elimizdiń barlyq óńirlerinde dástúrli túrde 1 qyrkúıekte ótedi. Bul týraly Oqý-aǵartý mınıstrliginiń baspasóz hatshysy – resmı ókili Mereke Amangeldiqyzy habarlady.

2024-2025 jańa oqý jylynda 345 myń birinshi synyp oqýshysy alǵash ret mektep partasyna otyrady. Olar úshin 1 qyrkúıekte «Mektebim — meıirim mekeni» taqyrybynda saltanatty shara ótedi. 

«2 qyrkúıekte — jańa oqý jylynyń birinshi kúni — „Meniń Otanym — Qazaqstan“ taqyrybynda Biryńǵaı synyp saǵatymen bastalyp, ári qaraı sabaq kestesine sáıkes jalǵasady. 

Pedagogterdiń eńbegine aqy tóleýge qatysty Qazaqstan Respýblıkasy Eńbek kodeksiniń 79-babyna sáıkes jumys berýshi qyzmetkerdiń naqty jumys istegen jáne jumys istemegen ýaqytynyń esebin júrgizýge mindetti ekenin habarlaımyz», — dep málimdedi mınıstrliktiń resmı ókili.

Derekke qaraǵanda, demalys jáne mereke kúnderi jumys istegen qyzmetkerdiń qalaýy boıynsha basqa demalys kúni beriledi nemese qyzmetkerdiń kúndik (saǵattyq) mólsherlemesi boıynsha keminde eki ese mólsherde aqy tólenedi.