Almaty mektepteri men kolledjderinde qandaı JI qoldanylady
ALMATY. KAZINFORM - Memleket basshysy Qasym-Jomart Toqaev bıyl sáýir aıynda Aqordada ótken Ǵylym jáne tehnologııalar jónindegi ulttyq keńestiń otyrysynda jasandy ıntellektini damytý máselesine erekshe toqtalǵan bolatyn. Osy oraıda, Kazinform tilshisi Almaty qalasynyń Bilim basqarmasynan megapolıs oqý oryndarynda jasandy ıntellekt qalaı qoldanylyp jatqanyn surap, saýal joldady.
Basqarma Almaty qalasynyń mektepteri qazirgi ýaqytta jasandy ıntellekti oqý barysynda qoldanatynyn habarlady.
«Jasandy ıntellekt quraldary oqýshylardyń aqparatty tereń túsinýine, shyǵarmashylyqtaryn damytýyna jáne tehnologııalyq daǵdylaryn jaqsartýǵa múmkindik beredi. Bul baǵyttaǵy jumys jalǵasyp, oqýshylardyń bilim alý protsesin jaqsartý jáne shyǵarmashylyq qabiletterin damytý maqsatynda mektep muǵalimderi JI quraldaryn zerdelep jatyr», - delingen basqarma jaýabynda.
Sondaı-aq Bilim basqarmasy mektepterde qoldanylatyn naqty JI quraldaryn nazarǵa usyndy:
1. ChatGPT
Sıpattamasy: OpenAI jasaǵan tildik model. Oqýshylar suraqtarǵa jaýap alý, shyǵarmashylyq jumystar jazý, ıdeıalar generatsııalaý úshin paıdalanady.
Paıdasy: Oqýshylardyń tildik daǵdylaryn damytý, óz oılaryn júıeli túrde jetkizý qabiletin arttyrý.
2. DALL-E
Sıpattamasy: OpenAI jasaǵan qural, mátindik sıpattama negizinde sýretter generatsııalaıdy. Oqýshylar shyǵarmashylyq jobalaryna vızýaldy kontent jasaı alady.
Paıdasy: Vızýaldy kommýnıkatsııany jaqsartý, shyǵarmashylyq oılaýdy damytý.
3. Canva s AI
Sıpattamasy: Dızaın jasaý platformasy, JI múmkindikteri arqyly avtomatty túrde grafıkalyq materıaldar, prezentatsııalar jáne ınfografıkalar qurastyrýǵa múmkindik beredi.
Paıdasy: Dızaın daǵdylaryn damytý, aqparatty vızýalızatsııalaý qabiletin arttyrý.
4. DeepAI
Sıpattamasy: Ártúrli mashınalyq oqytý quraldaryn usynatyn platforma, mátinderden nemese ıdeıalardan sýretter jasaýǵa múmkindik beredi.
Paıdasy: Shyǵarmashylyq jobalarda vızýalızatsııa jasaý, oqýshylardyń tehnıkalyq daǵdylaryn jetildirý.
5. Lumen5
Sıpattamasy: Mátindi vıdeolarǵa avtomatty túrde aınaldyrýǵa múmkindik beretin platforma. Oqýshylar maqalalar men mátinderden qysqa beınemazmun jasaı alady.
Paıdasy: Vıdeomazmun jasaý daǵdylaryn damytý, aqparatty kreatıvti túrde jetkizý.
6. Google Bard
Sıpattamasy: Google-diń jasandy ıntellekt negizindegi tildik modeli. Oqýshylarǵa ıdeıalar, joba taqyryptary men oqý materıaldaryn generatsııalaýǵa kómektesedi.
Paıdasy: Oqý protsesin jeńildetý, shyǵarmashylyq jáne zertteý daǵdylaryn damytý.
Sonymen qatar Bilim basqarmasynyń málimetine sáıkes, matematıka sabaǵynda Plug.XR, geogebra, gencraft.com, al qazaq ádebıetin oqytýda Khan Academy, Edpuzzle, Nearpod, TED-Ed jasandy ıntellektileri qoldanylady.
Almaty kolledjerinde JI qalaı qoldanylady
Almaty qalasynyń Bilim basqarmasy tehnıkalyq jáne kásiptik bilim berý uıymdarynda keıbir mamandyqtardyń erekshelikterine qaraı jasandy ıntellekt oqý protsesinde paıdalanylatynyn habarlady.
«JI oqý úderisinde muǵalimdermen de, stýdenttermen de belsendi túrde qoldanylady. Muǵalimder ony tapsyrmalardy jasaý, olardy tekserýdi avtomattandyrý jáne úlgerim týraly taldaý alý úshin paıdalanady. Bul ýaqytty únemdeýge jáne stýdenttermen jumys isteýge nazar aýdarýǵa múmkindik beredi», - delingen basqarma jaýabynda.
Sondaı-aq qalalyq Bilim basqarmasynyń málimetine sáıkes, «Baǵdarlamalyq qamtamasyz etý» mamandyǵy boıynsha 3 kýrs stýdentteri úshin 2022 jyldan bastap oqý josparyna jasandy ıntelektti jasaý jáne ony qoldaný ádisterin úıretetin modýl engizilgen. Keıbir kolledjde «Robototehnıka jáne jasandy ıntelekt» elektıvti pán oqytylady.
«Jalpy bilim berý jáne arnaıy pánderde, óndiristik tájirıbeden ashyq sabaq, master-klass kezinde prezentatsııa ázirleýde, praktıkalyq tapsyrmalar oryndaýda Gamma, ChatGPT, D-ID studio, Wepik jáne t.b. JI qoldanylady», - dep habarlady basqarmadan.
Eske salaıyq, buǵan deıin Qazaqstanda alǵashqy jasandy ıntellekt mektebi ashylǵanyn jazǵanbyz.
Sondaı-aq jasandy ıntellekt bilim berý salasyn qalaı ózgertip jatqany týraly sarapshylar pikirin usynǵanbyz.
