Almaty mańynda turǵyndar birneshe kún sýsyz otyr

ALMATY. KAZINFORM – Almaty mańyndaǵy Besaǵash aýylynda ornalasqan birneshe turǵyn úı kesheni sýsyz otyr.

Ótken aptanyń sońynda «Almataý Nýrııa» turǵyn úı kesheniniń sý jabdyqtaý jelilerinde apat bolyp, turǵyndar sol ýaqyttan beri sýsyz otyr.

Talǵar aýdanynyń ákimdigi jaǵdaıǵa túsinikteme berdi. Resmı jaýapqa sáıkes, jıi bolatyn tehnıkalyq aqaýlar men apattyq jaǵdaılarǵa baılanysty «Alatau Public Utilities» JShS qazirgi tańda turǵyn úı keshenderi paıdalanyp júrgen sý qubyryn aýystyryp jatyr.

- Qoldanystaǵy sý qubyry qurylys normalary buzylǵan jaǵdaıda salynǵan (bul týraly tıisti aktiler men Talǵar aýdany ákiminiń qatysýymen ótken keńestiń hattamasy bar), jekemenshik jer telimderiniń ústimen ótedi jáne jıi isten shyǵady. Sonymen qatar, dıametri 280 mm eki jipten turatyn qubyr bóligi — «Almaty Sý» MKK jelisine qosylý núktesinen bastap nasos stantsııasyna deıingi aralyq jeke menshiktegi jerler arqyly ótkendikten, apattardy joıý men tehnıkalyq jumystar júrgizýge edáýir kedergi keltiredi, - dep habarlady ákimdikten.

13–16 maýsym aralyǵynda iske qosý-retteý jumystary barysynda 6 tótenshe jaǵdaı tirkelip, dereý joıý sharalary qabyldanǵan. Qalpyna keltirý jáne apattyq jumystardy aıaqtap, sý berý búginge josparlanǵan.

Eske salaıyq, byltyr Bostandyq aýdanynyń 20 myń turǵyny sýsyz qalǵanyn jazǵanbyz.

Keıin Almaty ákimdigi 20 myń turǵyndy sýsyz qaldyrǵan kompanııany sotqa berdi.