Almaty kitaphanalaryna Braıl dıspleıleri ornatyldy
ALMATY. KAZINFORM – Almaty kitaphanalaryna Braıl dıspleıleri ornatyldy, olar mátindi taktıldi formatta kórsetedi.
Almaty kitaphanalarynda Braıl qarpimen basyp shyǵaratyn prınterler, mátinderdi úlkeıtý jáne olardyń kontrastyn ózgertýge arnalǵan qurylǵylar, mátindi oqyp, ony dybystyq formatta shyǵarýǵa jáne aýdıoǵa aınaldyrýǵa múmkindik beretin skanerler qoljetimdi.
Bul jumystar kózi nashar kóretin jáne zaǵıp jandar úshin kitaptar men basqa da bilim berý materıaldaryna ınklıýzıvti qoljetimdilikti qamtamasyz etý maqsatynda júrgizildi.
Jobanyń artyqshylyǵy, arnaıy jumys stantsııalarynda kózi nashar kóretin azamattar ózderi qyzmet etedi. Bul kelýshilerge olardyń qajettiligin jaqsy túsinetin mamandardan bilikti kómek alýǵa múmkindik beredi.
– Basty maqsatymyz – barlyq azamattyń bilimge qol jetkizýin qamtamasyz etý. Biz kitaphanalardy árkim oqyp, damýǵa múmkindik alatyn ınklıýzıvti keńistikke aınaldyrýǵa tyrysamyz. Qala ákimi Almatyny ádiletti jáne ár turǵynǵa qamqorlyqpen qaraıtyn úlgi qala etý mindetin qoıyp otyr. Biz sonyń ishinde mádenıet salasynda, osy maqsatqa qol jetkizetin bastamalardy belsendi túrde engizip jatyrmyz. Jalpy, ár kitaphana qoǵam ómiriniń ortalyǵyna, damý, shyǵarmashylyq jáne ózara árekettesý keńistigine aınalýda, munda oqyrmandar resýrsty, qoldaýdy jáne shabytty taba alady, – dedi Almaty qalasy mádenıet basqarmasynyń basshysy Ǵanı Maılybaev.
Arnaıy jumys stantsııalary ornatylǵan kitaphanalar:
– A.P. Chehov atyndaǵy Ortalyq qalalyq kitaphana (Gogol kóshesi, 109), №14 kópshilik kitaphana-fılıaly (Rımskıı-Korsakov kóshesi, 3);
– №4 kópshilik kitaphana-fılıaly (Abaı dańǵyly, 141), ALATAU CREATIVE HUB (Nurkent shaǵyn aýdany, 5/11);
– №45 kópshilik kitaphana (Mamyr-7 shaǵyn aýdany, 8 a);
– Jambyl atyndaǵy qalalyq jasóspirimder kitaphanasy (Nazarbaev kóshesi, 43);
– Qazaq jazýshylary kitaphanasy (Altynsarın kóshesi, 37).
Osyǵan deıin Almatyda táýlik boıy jumys isteıtin kitaphanalar ashylyp jatqany týraly jazǵan edik.