Almaty kóshelerinen 11 myń tekshe metrden astam qar shyǵaryldy
ALMATY. KAZINFORM – Almatyda 16–18 qańtar aralyǵynda jaýǵan mol qardan keıin tazalaý jumystary jalǵasyp jatyr.
«Qazgıdromet» RMK dereginshe, osy kezeńde qala aýmaǵyna 18 santımetr qar túsken. Bul týraly Almatynyń kommýnaldyq ınfraqurylym jáne turǵyn úı ınspektsııasy basqarmasynyń ókilderi aıtty.
Qazirgi ýaqytta jaýyn-shashyn joq, kúndizgi aýa temperatýrasy -11-13 gradýs shamasynda. Kólik pen júrginshiler qozǵalysyn qaýipsiz ári úzdiksiz qamtamasyz etý úshin kommýnaldyq qyzmet kúsheıtilgen rejımde jumysyn jalǵastyryp jatyr.
– Qar jaýǵan shaqta jol-kóshe jelisi keshendi tazalandy. 210 qum sebý tehnıkasynyń kómegimen 7 250 tonna kóktaıǵaqqa qarsy materıal sebildi, patrýldik jol polıtsııasy ekıpajdarynyń erip júrýimen 28 qar ysyrý kolonnasy jumys istedi. Kúndizgi ýaqytta 75 jedel brıgada, 1,7 myńnan astam jol salasy jumysshysy jáne 900-den astam arnaıy tehnıka tartyldy. Qar úıindileri jınalyp, magıstraldyq jáne júrginshi kóshelerinen, sondaı-aq qoǵamdyq oryndardan qardy táýlik boıy shyǵarý uıymdastyryldy. 18 qańtar saǵat 12:00-degi jaǵdaı boıynsha 11 250 tekshe metr qar shyǵaryldy, - delingen habarlamada.
Sonymen qatar trotýarlar, qoǵamdyq kólik aıaldamalary, jerústi ótkelderi, baspaldaqtar men pandýstardy arnaıy tehnıkanyń kómegimen jáne qolmen tazalanyp jatyr.
Eske salaıyq, buǵan deıin Almatyda 15 santımetrden astam qar jaýǵanyn jazǵanbyz.