Almaty qalasyna jańa mártebe berildi
ALMATY. KAZINFORM – Almaty qalasyna World Craft City – dúnıejúzilik qolóner qalasy mártebesi resmı tabystaldy.
Bul sheshimdi Dúnıejúzilik qolónershiler keńesi (World Crafts Council) qabyldady. Olar Almatynyń mádenı murany saqtaýdaǵy, qolónerdi damytý men kreatıvti ekonomıkany qoldaýdaǵy úlesin alǵa tartty.
Saltanatty rásim Almatyda uıymdastyrylǵan ALA CRAFT 2025 halyqaralyq festıvali aıasynda ótti. Festıvalge Qazaqstan, Azııa, Eýropa, Avstralııa jáne AQSh elderinen 100-den astam sheber qatysty.
- Almatyǵa World Craft City mártebesiniń berilýi – qalamyz úshin mańyzdy jetistik. Ol Almatynyń kreatıvti ındýstrııa men mádenı týrızm ortalyǵy turǵysynan halyqaralyq bedelin nyǵaıtady. Sonymen qatar bizdegi qolónerdi jahanǵa tanytýǵa, bilim berý baǵdarlamalaryn, halyqaralyq sheberlik rezıdentsııalaryn damytýǵa jáne qolónerdiń qala ekonomıkasyna ıntegratsııalanǵan turaqty ekojúıesin qalyptastyrýǵa jol ashady, – dedi Almaty qalasy týrızm basqarmasynyń basshysy Ǵalııa Toqseıitova.
Eske salaıyq, byltyr Almaty «Dúnıejúzindegi qolóner qalalary» tizimine enýi múmkin ekenin jazǵanbyz.
2025 jyldyń alǵashqy jartysynda Almatyǵa 1,14 mıllıonnan astam týrıst keldi. Onyń - 323,5 myńy sheteldik meıman.