Almaty dárigerleri súıek kemiginiń donory bolýǵa shaqyrady
ALMATY. KAZINFORM – Almatyda ornalasqan qalalyq qan ortalyǵynda qan donorlyǵynan bólek, súıek kemigi donory bolýǵa bolady. Bul týraly Donorlar jınaqtaý bóliminiń meńgerýshisi Nurdáýlet Ábdiqadyrov aıtyp berdi.
- Gemopoetıkalyq diń jasýshalaryn transplantatsııalaý - qannyń qaterli aýrýlaryn jáne basqa gematologııalyq aýrýlardy emdeýdiń jańa damyǵan tehnologııalyq ádisi. Gemopoetıkalyq diń jasýshalary ár adamnyń súıek kemiginde bolady, olardan adamnyń barlyq qan jasýshalary: erıtrotsıtter, leıkotsıtter, monotsıtter paıda bolady. Bul jasýshalardyń súıek kemigi men ımmýndyq júıeniń zaqymdalǵan fýnktsııasyn qalpyna keltirý qabileti ımmýn tapshylyǵyn, gematologııalyq jáne onkologııalyq aýrýlardy emdeýde bolashaǵy zor ekenin kórsetedi. Kóp jaǵdaıda ómirdi qutqarýdyń jalǵyz joly - gemopoetıkalyq diń jasýshalaryn transplantatsııalaý, - dedi Nurdáýlet Ábdiqadyrov.
Dárigerdiń aıtýynsha, Qazaqstanda jyl saıyn 300-den astam adam súıek kemigin transplantatsııalaýdy qajet etedi jáne olardyń jartysy balalar men jasóspirimder. Sońǵy 13 jylda 700-den astam adamǵa súıek kemigi transplantatsııasy jasalǵan. Sonymen qatar, búgingi kúni elimiz boıynsha 11 myńǵa jýyq adam donor retinde tirkelýge kelisim bergen.
- 18 jastan 45 jasqa deıingi salmaǵy 50 kelidee joǵary, aýyr aýrýlary joq Qazaqstan azamattary súıek kemiginiń donory bola alady. Súıek kemiginiń donory bolý qaýypti emes. Іs júzinde turaqty qan tapsyrýmen birdeı, janama áseri joq, donordyń jasýshalary 10-14 kúnnen keıin denede tolyǵymen qalpyna keledi, - dep atap ótti ol.
Súıek kemigi donorlarynyń tirkemesine kirý úshin:
- Qalalyq qan ortalyǵyna baryńyz (Almaty qalasy Buhar jyraý kóshesi №47) tel: 8(727)338-23-81, 8(707)456-00-49;
- Tirkelimge kirýge ótinish-kelisimdi toltyryńyz;
- Saýalnamaǵa jaýap berińiz;
- Fenotıp taldamasyn jasaýǵa 9 ml qan úlgisin ótkizińiz (qan úlgisin ótkizý kúnin telefon arqyly aldyn ala kelisý kerek);
- Donor týraly aqparat súıek kemigi donorlarynyń tirkeliminiń derekqoryna engiziledi. Eger donor men naýqas arasynda fenotıpter sáıkes kelse, ulttyq tirkelim qyzmetkeri mindetti túrde donormen habarlasady.
