Almaty áýejaıynyń aýmaǵyna kirý jáne shyǵý shemasy ózgerýi múmkin

ALMATY. KAZINFORM – Almaty áýejaıynyń aýmaǵyna kólikterge kirý jáne shyǵý shemasy ózgerýi múmkin. Bul týraly Halyqaralyq Almaty áýejaıynyń prezıdenti Alp Er Týnga Ersoı málimdedi.

«Qazir Almaty áýejaıynyń aýmaǵyna mashınalar Maılın kóshesi arqyly kirip, shyǵady. Bul áýejaıǵa kirý jáne shyǵý kezinde qosymsha keptelister týdyrady. Degenmen, qazir ákimdikpen tyǵyz jumys istep jatyrmyz. Biz áýejaıǵa Ahmetov kóshesimen kirip, Maılın kóshesi arqyly shyǵýdy usyndyq. Bul másele ákimdikpen birlesip pysyqtalyp jatyr. Sheshim qabyldanǵannan keıin biz ózderińizge qosymsha habarlaımyz», - dedi Alp Er Týnga Ersoı.

Onyń aıtýynsha, Almaty áýejaıyna kún saıyn 16 myńǵa jýyq kólik kiredi. Onyń 65 paıyzy jolaýshylardy ákep tastaıtyndar nemese alyp ketetinder.

«Biz jolaýshylardy túsirý jáne alyp ketý úshin qosymsha jelini jasadyq, biraq, ókinishke qaraı, barlyq júrgizýshi, ásirese qarbalas ýaqytta, áýejaıdyń turaq aımaǵyndaǵy erejelerdi saqtaı bermeıdi, olar kólikterin joldyń ortasynda qaldyrady nemese sol jerde túsiredi. Jańa termınalǵa keler bolsaq, biz ony paıdalanýǵa bergennen keıin bizde avtokólikterge arnalǵan qosymsha úsh jol jelisi bolady», - dedi ol.