Almaty ákimdigi bıyl 30 jaýapsyz merdigerdi sotqa bergen

ALMATY. KAZINFORM – Almatyda tekseris nátıjesinde ınjenerlik ınfraqurylym boıynsha birneshe merdiger lıtsenzııasynan aıyryldy.

Almaty qalasy ákiminiń orynbasary Almashan Smatlaevtyń aıtýynsha, talaptardyń júıeli túrde buzylýyna jol bergen «AsiaMax» JShS, «SK 7 Stroı» JShS, «Enerdjı-Taraz» JShS, «Alataý sapa qurylys» JShS jáne ózge de merdiger uıymdar lıtsenzııasynan aıyryldy.

— Júıeli tekseris pen jospardan tys baqylaý nátıjesinde sapa men normatıvtik talaptardyń saqtalýyn qamtamasyz etpeıtin kompanııalardyń qala jobalarynda jumys isteýge quqyǵy joq degen qatań sheshim qabyldandy, — dedi ol.

Odan bólek Almashan Smatlaev jaýapsyz merdigerlerge qatysty 30 talap-aryz daıyndalyp, sotqa joldanǵanyn atap ótti.

— Tıisti ruqsatsyz nemese belgilengen normalardy buza otyryp júrgizilgen jumystar qatań ákimshilik sharalar arqyly toqtatylady. Bul - aıyppul, qyzmetti toqtatý, keltirilgen shyǵyndy óteý, kelisimsharttardy buzý jáne lıtsenzııadan aıyrýǵa deıin jetýi múmkin, — dedi qala ákiminiń orynbasary.

Eske salaıyq, buǵan deıin Almaty birneshe qurylys kompanııasy men tehnıkalyq qadaǵalaý uıymdary lıtsenzııasynan aıyrylǵanyn jazǵanbyz.