Almaty ákimdigi 2021 jyldan beri jumysyn aıaqtamaǵan 2 merdigerdi sotqa berdi

ALMATY. KAZINFORM – Almatyda qalalyq máslıhattyń kezekten tys XXXV sessııasy ótti.

Sessııa barysynda Almaty qalasynyń 2025-2027 jyldarǵa arnalǵan bıýdjeti qaraldy. Suraq-jaýap kezinde depýtattar Qoǵamdyq keńistikterdi damytý basqarmasynyń basshysy Batyrhan Súleımenovtan «Kemel» shaǵyn aýdanynda uzaqqa sozylǵan abattandyrý jumystary týraly surady.

- «Kemel» shaǵyn aýdanynda aýmaqty abattandyrý jobasy 2021 jyly bastalǵan. Sol ýaqyttan beri bizde 2 merdiger boldy jáne ekeýimen de sot boldy. Bul ister Almaty ákimdiginiń paıdasyna sheshildi. Sot úkimimen aldyn ala berilgen qarajat qaıtarylady, - dedi ol.

Sondaı-aq ol 2025 jyldyń sońyna deıin eskirgen jobalaý-smetalyq qujattamaǵa ózgerister engiziletinin atap ótti. Aıtýynsha, abattandyrý jumystary 2026 jyldyń qazan aıyna deıin aıaqtalady.

Eske salaıyq, buǵan deıin Almatyda opyrylǵan jol úshin merdiger jaýapqa tartyldy.