Almaty-3 vokzalynyń qurylysy qashan aıaqtalady
ALMATY. KAZINFORM - Almatyda jańa «Almaty-3» temirjol vokzalyn salý jobasy boıynsha jumystar jalǵasyp jatyr.
Qazirgi ýaqytta nysannyń Boraldaı – Ańseńgir aralyǵyndaǵy tehnıkalyq-ekonomıkalyq negizdemesi ázirlenip jatyr.
Qalalyq mobıldilik basqarmasynyń agenttiktiń resmı saýalyna bergen jaýabyna sáıkes, bul jumystardy 2025 jylǵy 31 qazanǵa deıin aıaqtaý josparlanǵan.
– Boraldaı – Aqseńgir aralyǵynda jolaýshy jáne júk qozǵalysyn qamtamasyz etý úshin «Almaty-3» vokzalyn salý jónindegi tehnıkalyq-ekonomıkalyq negizdeme ázirlenip jatyr. Jumystardy aıaqtaý merzimi – 2025 jylǵy 31 qazan (saraptamadan ótýsiz), – delingen jaýapta.
Qurylys jumystarynyń bastalýy men barlyq kezeńiniń aıaqtalý merzimi tehnıkalyq-ekonomıkalyq negizdeme daıyn bolǵan soń belgili bolady. Sondaı-aq qazirgi ýaqytta naqty quny men qarjylandyrý kózi anyqtalǵan joq.
Joba aıasynda qorshaǵan ortaǵa áserin baǵalaý bólimi boıynsha qoǵamdyq tyńdaýlar ótkizý josparlanǵan.
– Joba sheńberinde kóliktik torap uıymdastyrylyp, oǵan qalaaralyq jáne qalalyq avtobýstar aıaldamalary, LRT, jeke kólikter men taksı turaǵy kiredi, – dep atap ótti qalalyq mobıldilik basqarmasy.
Ákimdik málimetinshe, «Almaty-3» vokzalynyń qurylysy megapolıstiń kólik ınfraqurylymyn damytýdaǵy mańyzdy qadam bolmaq.
Boljam boıynsha, jańa vokzaldan qatynaıtyn jolaýshylar sany 2027 jyly shamamen 1,12 mln adamǵa jetedi, al 2040 jylǵa qaraı 1,97 mln adamǵa deıin ósedi. Budan bólek, júk aınalymy 2030 jylǵa qaraı jylyna 620 myń tonnaǵa jetýi múmkin.
Almatyda úshinshi temirjol vokzalyn salý jospary alǵash ret 2021 jyly aıtyla bastaǵan edi.
2024 jyldyń basynda Almaty ákimdigi jańa temirjol platformasy úshin jer ýchaskesi «Qazaqstan temir joly» AQ-nyń magıstraldyq jelisinde ornalasqanyn habarlaǵan. Joba Mádenıet shaǵyn aýdanynyń mańynda júzege asyrylyp, platformany «Qazaqstan temir joly» óz kúshimen salatyny aıtylǵan. Sol kezde jańa vokzaldyń 2026-2027 jyldary paıdalanýǵa berilýi josparlanǵan edi.
Eske salaıyq, buǵan deıin «Qazaqstan temir joly» ulttyq kompanııasyna qaıtarylǵan Almaty-1 jáne Almaty-2 temirjol vokzaldarynyń qazirgi jaı-kúıi týraly jazǵan edik.