Alma týraly anımatsııalyq fılm túsirilgeli jatyr

ASTANA. QazAqparat - «Qazaqfılm» kınostýdııasynyń anımatsııalyq kıno-shyǵarmashylyq birlestiginiń basshysy Adaı Ábdilda alma týraly anımatsııalyq fılm túsirilgeli jatqanyn málim etti, dep habarlaıdy QazAqparat tilshisi.

«Kúltegin» fılminde oqıǵa boıynsha úsh taıpa bar. Onyń biri - Shoıynqara degen kósemi bar temirshiler taıpasy. Olar temir qorytyp, qarý-jaraq soǵyp, qala salýmen aınalysady. Bul arada Elbasynyń maqalasynda temir qorytý qazaq dalasynan bastalǵany týraly aıtylǵanyn atap ótý kerek. Ekinshisi, Tumar degen qolbasshysy bar qyzdar taıpasy. Olar - sadaqshylar ári shóppen emdeıtin emshiler. Bul jerde  biz medıtsınadan da burynnan halqymyzdyń habary bar ekenin kórsetkimiz keldi. Sol sekildi «Kúlteginde»  kórsetilgen faktiler kezdesedi», - dedi Adaı Ábdilda QR Mádenıet jáne sport mınıstrlininiń baspasóz ortalyǵynda ótken brıfıng barysynda.

Adaı Ábdilda sonymen qatar alma týraly  jobany da oılastyryp jatqanyn tilge tıek etti.

«Kezinde Ámen Qaıdarovtyń kózi tiri kezinde bir joba bastaǵan.  Almatynyń tarıhyn, almanyń qaıdan shyqqanyn túsirý týraly armany bar edi. Sol stsenarııdi qazir qolymyzǵa túsirip, taǵy da bir qorytyp jatyrmyz. Qalaı ony búgingi balalarǵa qyzyqty etip, anımatsııalyq turǵyda kórsetýge bolady? Bul - ýaqytty qajet etetin aýqymdy jumys, árıne. Biraq, biz ol jumysty bastaǵaly jatyrmyz», - deıdi Adaı Ábdilda.

Eske sala ketsek, Elbasy Nursultan Nazarbaev óziniń «Uly dalanyń jeti qyry» atty maqalasynda «Qazaqstan - alma men qyzǵaldaqtyń otany» ekenin atap ótken bolatyn.

«Asqaq Alataýdyń baýraıy alma men qyzǵaldaqtyń «tarıhı otany» ekeni ǵylymı turǵydan dáleldengen. Qarapaıym, biraq búkil álem úshin ózindik mán-mańyzy zor bul ósimdikter osy jerde búr jaryp, jer júzine taralǵan. Qazaqstan qazir de álemdegi alma ataýlynyń arǵy atasy - Sıvers almasynyń otany sanalady. Dál osy tuqym eń kóp taralǵan jemisti álemge tartý etti. Bárimiz biletin alma - bizdegi almanyń genetıkalyq bir túri. Ol Qazaqstan aýmaǵyndaǵy Іle Alataýy baýraıynan Uly Jibek jolynyń kóne baǵyty arqyly alǵashqyda Jerorta  teńizine, keıinnen búkil álemge taralǵan. Osy tanymal jemistiń tereń tarıhynyń sımvoly retinde elimizdiń ońtústigindegi eń ásem qalalardyń biri Almaty dep ataldy», - deıdi Prezıdent óz maqalasynda.