Allergııadan arylýǵa bola ma – allergolog pikiri

ASTANA. KAZINFORM – Búgin – Dúnıejúzilik allergııamen kúres kúni. Allergııa emdele me? Qalaı allergııanyń aldyn alýǵa bolady? Jibek Joly arnasynyń «Búgin LIVE» baǵdarlamasyna onlaın suhbat bergen allergolog-ımmýnolog dál osy suraqtarǵa jaýap berdi.

- Ádette jaz mezgilinde polınoz, jýsanǵa allergııa kóp kezdesedi. Munyń bári maýsymdyq allergııaǵa jatady. Onyń túrleri óte kóp. Ol taldan, shópten, aramshópten, gúlderden jáne ózge nárselerden bolýy múmkin. Ártúrli tıpke ártúrli qan taldaýlaryn jasaımyz. Qazaqstandyqtarda kóbine jýsanǵa reaktsııa beredi. Kóbisi allergııanyń emi bar ma, joq pa dep qorqyp jatady. Naqty maýsymdyq allergııany emdeýge bolady. Arnaıy allergen-spetsıfıkalyq ımmýndyq terapııa arqyly 3–4 jylda allergııadan aryla alasyzdar, – deıdi Áıgerim Baqytjan.

Halyq arasynda sán salonyna, tis emhanasyna baryp, anafılaksııalyq shok aldy degendi jıi estip jatamyz. Mundaı jaǵdaı adam ómirine asa qaýipti. Maman qandaı da bir zatqa allergııa bolý múmkin ekenin aldyn ala bilý qıyn ekenin aıtady. Eń tıimdi sheshim – emhanada anafılaksııalyq shok alǵan adamǵa kómek kórsetý algorıtmin jetik bilý.

Allergııa ózge defıtsıtter sekildi aldyn ala tekserilip, dárigerge qaralatyn aýrý emes. Bul jerde eń birinshi patsıent týraly tolyq aqparat jınaý qajet. Ol kiside buryn reaktsııa boldy ma? Áke-sheshesinde nemese týǵan baýyrlarynda allergııa bolǵan ba? Kóbisi ózinde reaktsııa bar-joǵyn bilý úshin aldyn ala qan taldaýyn jasatyp jatady. Tipti analız teris kórsetse de, reaktsııa bolýy múmkin. Kerisinshe, oń kórsetip, reaktsııa bolmaýy da múmkin. Eń qynjyltatyny – jeke emhanalarda anafılaksııalyq shokqa arnalǵan eshqandaı bokstar joq. Eger klınıkadaǵy maman anafılaksııalyq shok kezinde ne jasaý kerektiginiń algorıtmin bilip tursa, ólimge ákelý ne aýyr asqynýlardyń bolýy sırek bolatyn edi.

Aıta keteıik, bıyldan bastap mektep ashanalarynda allergııasy bar balalardyń dıetalyq erekshelikteri eskeriledi.