Alqabıler sotyna kandıdattar tizimin ákimdikter jasaıdy

ASTANA. KAZINFORM – QR Joǵarǵy soty Qazaqstan zańnamasyna sáıkes alqabıler sotyna kimder qatysa alatynyn túsindirdi.

«Zańǵa sáıkes 25 jasqa tolǵan jáne ákimdikter jasaıtyn kandıdattardyń biryńǵaı tizimine engen kez kelgen Qazaqstan azamaty alqabı bola alady. Jas shegi belgilendi, oǵan jetkende adamnyń belgili bir ómirlik tájirıbesi, bilimi bar jáne óz betinshe sheshim qabyldaı alady. Zań aıasynda alqabıge qabyldaý kezinde ultyna, áleýmettik nemese múliktik jaǵdaıyna, dinge kózqarasyna, nanymyna baılanysty shekteýlerge tyıym salynǵan», - delingen Joǵarǵy sottyń Kazinform agenttigine bergen jaýabynda. 

Sottylyǵy bar jáne basqa qylmystyq is boıynsha kúdikti nemese aıyptalýshy dep tanylǵan azamattar alqabıler múshesi bola almaıdy. Mundaı jaǵdaılar sheshim qabyldaý kezindegi obektıvtilikke áser etetini anyq. Sonymen qatar, sýdıalar, prokýrorlar jáne quqyq qorǵaý organdarynyń qyzmetkerleri alqabılerdiń qyzmetin atqara almaıdy.

«Bul talap úkimniń ádildigi úshin jasalyp otyr. Іs júrgizý tilin meńgermegen adamdar alqabılerdiń qyzmetinen bosatylady. Densaýlyqqa qoıylatyn talaptar bar, ıaǵnı úmitkerler psıhıkalyq nemese minez-qulyqqa qatysty densaýlyq saqtaý uıymdarynda tirkeýde turmaýy tıis», - dep atalyp ótken Joǵarǵy sot málimetinde. 

Budan buryn habarlanǵandaı, Burynǵy Ulttyq ekonomıka mınıstri Qýandyq Bıshimbaevtyń isine qatysty sot 27 naýryzǵa belgilendi. 

Sondyqtan basty sot otyrysyna alqabılerdiń biryńǵaı tiziminen 300 kandıdatty shaqyrylady.