Álııa Adambaeva «Dara» Prezıdenttik bastamalar qoryna jetekshilik etedi

ASTANA. KAZINFORM — «Dara» Prezıdenttik bastamalar qory Qamqorshylyq keńesiniń sheshimimen Álııa Adambaeva qor prezıdenti qyzmetine taǵaıyndaldy.

Álııa Adambaevanyń medıa, úkimet jáne qarjy salalarynda 25 jyldan astam kásibı tájirıbesi bar. Osy jyldar ishinde ol basshylyq qyzmetterdi atqardy, sonyń ishinde «Almaty qalasyn damytý ortalyǵy» AQ Basqarma tóraǵasynyń orynbasary jáne Basqarma múshesi, Qazaqstan Respýblıkasy Ulttyq banki baspasóz qyzmetiniń Aqparat jáne kommýnıkatsııalar departamentiniń dırektory, «Ortalyq kommýnıkatsııalar qyzmeti» RMM dırektorynyń orynbasary, sondaı-aq Almaty qalasy ákiminiń keńesshisi boldy.

Buǵan deıin ol Qazaqstannyń jetekshi iskerlik jáne qoǵamdyq-saıası BAQ-tarynda basshylyq jáne redaktsııalyq qyzmetter atqardy.

Onyń «Jýrnalıstıka» mamandyǵy boıynsha joǵary bilimi, ekonomıka jáne bıznes magıstri dárejesi, sondaı-aq MBA jáne Executive MBA dıplomdary bar.

Osydan buryn Almaty oblysy jumyspen qamtýdy úılestirý basqarmasynyń basshysy aýysqanyn jazǵanbyz.