Álıhan Smaıylov qaı salalarda óndiris artqanyn aıtty

ASTANA. QazAqparat - Memlekettik organdar men óńir ákimdikteri negizgi makroekonomıkalyq kórsetkishterge qol jetkizý boıynsha jumystardy kúsheıtýi tıis. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«7 aıdyń qorytyndysy boıynsha jalpy ishki ónim 4,8 paıyzǵa artty. Ekonomıkanyń ósimine naqty sektor aıtarlyqtaı úles qosty.

Máselen, óńdeýshi ónerkásipte ósim – 3, azyq-túlik óndirisinde – 4,5, sýsyndar óndirisinde 6,4 qurady. Jeńil ónerkásip salasy 21 paıyzǵa ósim kórsetti. Ol toqyma buıymdary óndirisindegi 37 paıyzdan astam ósim esebinen qamtamasyz etildi.

Plastmassa jáne daıyn metall buıymdarynyń óndirisi – 8, hımııa ónerkásibi 4,1 paıyzǵa artty.

Mashına jasaý salasy 29 paıyzǵa ulǵaıdy. Oǵan avtomobıl jasaýda – 43, elektr jabdyǵy óndirisinde – shamamen 34,5, lokomotıvter men vagondar jasaýda 30 paıyz ósim esebinen qol jetkizildi.

Jıhaz óndirisi 15 paıyzǵa artty», - dedi Úkimet basshysy.

Onyń dereginshe, qurylys salasy 12 paıyz turaqty ósim kórsetti. 8,5 mln sharshy metr turǵyn úı paıdalanýǵa berildi. Qyzmet kórsetý salasynda saýda shamamen – 10, baılanys – 8 jáne kólik salasy 7 paıyzǵa joǵarylady. Taý-ken óndirýdi esepke almaǵanda, negizgi kapıtalǵa salynǵan ınvestıtsııalar 14,4 paıyzǵa artty.

«7 aıdyń qorytyndysy boıynsha Abaı, Aqmola, Batys Qazaqstan, Qostanaı, Soltústik Qazaqstan oblystary men Almaty qalasynda barlyq negizgi makrokórsetkishter boıynsha ósim bar. Al Atyraý, Almaty jáne Ulytaý oblystarynyń kórsetkishteri tómen. Jaýapty memlekettik organdar men óńir ákimdikteri negizgi makroekonomıkalyq kórsetkishterge qol jetkizý boıynsha jumystardy kúsheıtýi tıis», - dedi Álıhan Smaıylov.