Álıhan Smaıylov geptıldiń onkologııalyq aýrýlardyń kóbeıýine áseri týraly kúdikti joqqa shyǵardy

NUR-SULTAN. QazAqparat – QR Premer-Mınıstri Álıhan Smaıylov depýtattyq saýalǵa bergen jaýabynda Jezqazǵan-Ulytaý óńirindegi turǵyndar arasynda onkologııalyq aýrýlardyń kóbeıýine zymyran tasyǵysh bólshekterdiń qulaýy áser etý múmkindigi týraly pikir bildirdi, dep habarlaıdy QazAqparat tilshisi.

«Búgingi tańda zertteý nátıjeleri boıynsha alynǵan derekter zymyran-ǵarysh qyzmetiniń tirshilik etý ortasynyń jaı-kúıine jáne tasymaldaǵysh zymyrandardan bólinetin bólikterdiń qulaý aýdandarymen shektes aýmaqtaǵy eldi mekender turǵyndarynyń densaýlyǵyna tikeleı áserin rastalmaǵanyn kórsetedi. Geptıl zymyran otynynyń depýtattyq suraýda sıpattalǵan patologııaǵa qatysy joq. Óıtkeni «Proton-M» zymyran tasyǵyshynan bólinetin bólikterdiń qulaıtyn aýdandarda eldi mekender joq», - dep dedi Álıhan Smaıylov depýtattyq saýalǵa bergen jaýabynda.

Onyń aıtýynsha, «Proton-M» zymyran tasyǵyshynyń qulaý aýdany Jezqazǵan qalasynan 73,3 shaqyrym jerde ornalasqan.

«Baıqońyr» kesheni boıynsha Qazaqstan-Reseı úkimetaralyq komıssııasynyń 2014 jylǵy 24 qarashadaǵy otyrysy aıasynda Qazaqstan Respýblıkasynyń qorshaǵan ortasyna ekologııalyq júktemeni azaıtý úshin 2017 jyldan bastap geptıl jaǵatyn «Proton-M» zymyran tasyǵyshyn ushyrýdy qysqartý (2017 jyly 2-ushyrý operatsııasy, 2020 jyly taǵy 2 operatsııa qysqartyldy. 2025 jyly 5 – ke deıin) jáne bul sanattaǵy zymyran tasyǵyshtardyń ushýyn múlde toqtatý kózdelgen», - dep jazady Úkimet basshysy.

Jaýapta Jezqazǵan-Ulytaý óńirindegi halyqtyń arasynda onkologııalyq aýrýlardyń artý sebebin zertteý qolǵa alynǵany aıtylǵan.

«Sonymen qatar Qaraǵandy oblysynyń Jezqazǵan-Ulytaý óńirindegi onkologııalyq aýrýlardyń ósý sebepterin zertteý maqsatynda Ekologııa, geologııa jáne tabıǵı resýrstar mınıstriniń 2022 jylǵy 4 naýryzdaǵy 69-Ó buıryǵymen múddeli memlekettik organdarmen jáne óńirdiń jurtshylyq ókilderimen birlesip vedomstvoaralyq komıssııa quryldy», - delingen jaýapta.