Álıhan Smaıylov EÚAK otyrysy aıasynda Reseı Úkimeti basshysymen kelissóz júrgizdi

NUR-SULTAN. QazAqparat - QR Premer-Mınıstri Álıhan Smaıylov Eýrazııalyq úkimetaralyq keńes otyrysynda Reseı Federatsııasy Úkimetiniń basshysy Mıhaıl Mıshýstınmen ekijaqty kelissóz júrgizdi, dep habarlaıdy QazAqparat primeminister.kz-ke silteme jasap.

Taraptar birqatar ózekti máselelerdi, atap aıtqanda, saýda-ekonomıkalyq, tranzıttik-kóliktik yntymaqtastyq, ónerkásiptik jáne otyn-energetıkalyq keshen, tsıfrlandyrý, ǵarysh salasy jáne t. b. qatysty máselelerdi talqylady. Reseı Federatsııasy – Qazaqstannyń negizgi saýda-ekonomıkalyq seriktesi. 2021 jyly eki el arasyndaǵy taýar aınalymynyń ósimi 29%-dy qurady.

«Ótken jyly AÓK-tegi ózara is-qımyl 32%-ǵa artty. Sonymen qatar bul sala úlken áleýetke ıe. Saýdany, onyń qurylymyn ulǵaıtý, jetkiziletin taýarlar nomenklatýrasyn keńeıtý jumystaryn jalǵastyrýdy usynamyz. Reseılik agroónerkásiptik bıznesti tyǵyz yntymaqtastyq ornatýǵa shaqyramyz», — dedi Á. Smaıylov. Tranzıttik-kóliktik yntymaqtastyq máselelerin talqylaı otyryp, Qazaqstan Premer-Mınıstri «Eýropa – Batys Qytaı» halyqaralyq kólik baǵytyn damytý jónindegi aýqymdy jobany atap ótti. Qurylystyń qazaqstandyq jáne qytaılyq ýchaskeleri aıaqtaldy. Jumystyń Reseı jaǵynda aıaqtalýy kútilýde.

Qazaqstan tarapy «Merıdıan» avtomobıl joly jobasynyń jalǵasy retinde Aqtóbe qalasynan Reseı shekarasyna deıin Oral qalasy arqyly Samaraǵa deıingi avtojol ýchaskesin qaıta jańartýdy kózdep otyr. Qozǵalys qarqyndylyǵynyń artýyna qaraı, ýaqyt óte kele 2025-2030 jyldary jol sanatyn 4 jolaqqa deıin keńeıtý josparda barr. Buǵan qosa Qazaqstan men Reseı arasyndaǵy áýe qatynasyn retteý máselesine erekshe kóńil bólindi. Qazirgi ýaqytta kórshi elder arasynda 21 baǵyt boıynsha aptasyna 54 reıs oryndalyp jatyr. Jalpy, reıster birtindep qalpyna kelýde. Alaıda, qajetti suranysqa tolyǵymen saı kelmeı otyr. Sonymen qatar Á. Smaılov pen M. Mıshýstın Qazaqstannyń soltústik jáne shyǵys óńirlerin, onyń ishinde Reseı Federatsııasynan keletin qubyr arqyly gazdandyrý joldaryn talqylady. «Gazprom» jáne «QazaqGaz» kompanııalary bıylǵy jyldyń birinshi toqsanynyń sońyna deıin Qazaqstannyń soltústik jáne shyǵys óńirlerin gazdandyrý jobasyna baǵalaý júrgizýi tıis. Taraptar gaz qubyrlaryn salý baǵyttary men tutyný kólemin anyqtaıdy. Á. Smaıylov qysqa merzimdi perspektıvada naqty sheshim qabyldaý úshin osy saladaǵy jumystardy jandandyrý qajet ekenin jetkizdi.

Óz kezeginde Mıhaıl Mıshýstın Eýrazııalyq ekonomıkalyq odaq formatyndaǵy ıntegratsııalyq baılanystardyń nyǵaıýyna jáne ózara qyzyǵýshylyqtarǵa sáıkes saýda-ekonomıkalyq yntymaqtastyqty qamtamasyz etýge senim bildirdi. «Reseı men Qazaqstan arasyndaǵy saýda-ekonomıkalyq yntymaqtastyǵymyz tabysty damyp kele jatqanyn atap ótkim keledi. 2021 jyly taýar aınalymy 2020 jylmen salystyrǵanda úshten birge artyp, $25 mlrd-tan asty. Bul bizdiń tarıhymyzdaǵy ózara saýdanyń rekordtyq kórsetkishi», — dedi Reseı Úkimetiniń basshysy. Kezdesý sońynda qazaqstandyq jáne reseılik taraptardyń ókilderi Reseı Federatsııasynyń Úkimeti men Qazaqstan Respýblıkasynyń Úkimeti arasyndaǵy Ekonomıkalyq yntymaqtastyqtyń 2021-2025 jyldarǵa arnalǵan keshendi baǵdarlamasyn iske asyrý jónindegi is-sharalar josparyna qol qoıdy.